Musanze: COVID-19 ntiracika burundu ariko ntiteje impungenge ku bukerarugendo

Akarere ka Musanze ni Akarere k’ubukerarugendo, ibikorwa by’ubukerarugendo byakomwe mu nkokora na COVID-19 igihe yari igikaze, ariko kuri ubu Ubuyobozi bw’Akarere ka Musanze buvuga ko Covid-19 itagiteje impungenge ku bukerarugendo, kuko itakiri icyorezo gikanganye nubwo itaracika burundu.

Ubu ni ubutumwa bwagarutsweho n’Umuyobozi wungirije w’Akarere ka Musanze ushinzwe imibereho myiza y’abaturage, Kamanzi Axelle, mu kiganiro yahaye abanyamakuru bibumbiye mu ishyirahamwe ABASIRWA, yasobanuye ko nubwo COVID-19 itaracika burundu, ariko itagiteye impungenge kandi ko bitabangamiye ubukerarugendo.

Ati: “Ubukana bwa virusi bwaragabanyutse, si nka mbere ariko n’ubu twibutsa abaturage ko COVID-19 igihari, […] nta mpungenge dufite ku kuba tuvuga ko dufite COVID-19 kandi turi Akarere k’ubukerarugendo.  Musanze ni igicumbi cy’ubukerarugendo kuko dufite Pariki y’Igihugu y’Ibirunga, ariko ni igice gishingiye ku nama, twakira inama nyinshi […]

Iyo tuvuga ubukerarugendo haba harimo abaza muri Pariki n’abaza mu nama ntitwabahisha ko dufite COVID-19 mu Karere ka Musanze, turabibabwira ko igihari kugira ngo nimuza gukora inama ku bijyanye n’ingamba buri wese amenye uko yitwara, akurikize ingamba, amenye uko yitwara nko mu guhaha wishyure ukoreheje ikoramabuhanga”.

Yongeyeho ati: “Nta mpungenge biduteye cyane cyane ko ubukerarugendo mpuzamahanga dufite bushingiye ku ngagi, n’ubundi abazisura baracyashyira mu bikorwa ingamba zimwe zo kwirinda kwandura nko kwambara agapfukamunwa iyo tugiye gusura ingagi”.

Visi Maya yakomeje agaragaza impamvuzitandukanye zishimangira ko ba mukerarugendo batabura gukomeza kuza kuko Leta yashyizeho ingamba zizewe.

Ati: “Nta mpungenge z’uko abantu batari buze, bazaga n’igihe COVID-19 ikiri icyorezo, ba mukerarugendo barazaga kuko igihugu cyashyizeho ingamba zose zo guhangana na COVID-19 ndetse n’ingamba zashyizweho zatumaga bita ku muntu aramutse yanduye. N’ubundi ntibagarutse kuko COVID-19 yarangiye, nta mpungenge dufite ku bijyanye n’ubukerarugendo”.

Ku birebana no kuba hakiri abagaragaraho COVID-19, ukuriye laboratwari y’ibitaro bya Ruhengeri, Ikundabayo Louise Marie atangaza ko nubwo ibi bihe COVID-19 yagenjeje make, hari bake bapima bakayibasangana, ariko bitagiteje ikibazo kuko hari n’ibyangombwa byasabwaga mbere ubona bitagisabwa cyane cyane ku bantu babaga baturutse hanze.

Ati: “Nyuma ya guma mu rugo, hatangiye ibikorwa bimwe na bimwe hagasabwa ibyangombwa birimo kwipimisha, ngo hagaragazwe ko abantu bagiye guhurira hamwe batarwaye, ariko kuri ubu hari ibyangombwa bitagisabwa kuko COVID-19 itakiri icyorezo. 

Ibintu bisaba ibisubizo bya COVID-19 bisa nk’aho byagabanyutse, […] mu byumweru bibiri bishize mu bantu 20 twapimye twasanzemo 2 bafite COVID-19. Mbere y’uko RDB itangaza ko ba mukerarugendo bazajya bajya gusura ingagi bambaye agapfukamunwa gusa nta kwipimisha COVID-19”.

Munyaneza Elissa utuye mu Murenge wa Musanze wari waje kwivuza ku Kigo nderabuzima cya Musanze yatangarije Imvaho Nshya ko abantu bagikomeje kwipimisha ndetse no kwikingiza COVID-19, kandi ko abona ibikorwa by’ubukerarugendo byongeye kwitabirwa cyane ugereranyije no mu gihe COVID-19 yari ikaze, ikikiri icyorezo.

Ati: “Imyumvire ku kwirinda COVID-19 yarahindutse, abaturage turabyumva neza kandi dukomeje gukurikiza ingamba zo kwirinda.  Ba mukerarugendo ubu bariyongereye ugereranyije n’igihe COVID-19 yari ikaze, kuri ubu bamukerarugendo baduhahira ibikoresho by’ubukorikori dukora hano mu makoperative”.

Inzego z’ubuzima zitangaza ko kuva hagaragaye umurwayi wa mbere mu Rwanda ku italiki 14 Werurwe 2020  kugeza muri uku kwezi kwa Kanama 2023, Akarere ka Musanze kagize Abarwayi ba COVID-19 bangana na  7230, abahitanywe na COVID-19  bakaba 69.