Igikombe cy’Isi cy’Amakipe: Real Madrid yanganyije, Man City itangirana itsinzi 

Real Madrid yanganyije na Al Hilal yo muri Arabie Saoudite igitego 1-1 naho Manchester City itsinda Wydad AC yo muri Maroc ibitego 2-0, mu mikino y’umunsi wa mbere w’amatsinda mu Gikombe cy’Isi cy’Amakipe kiri kubera muri Amerika.

Iyi mikino yombi yabaye ku wa Gatatu tariki ya 18 Kamena 2025.

Umukino wa Real Madrid na Al Hilal wari utegerejwe cyane kuko wari uwa mbere ku batoza b’amakipe yombi; Xabi Alonso ku ruhande rwa Real Madrid na Simone Inzaghi kuri Al Hilal.

Uyu mukino watangiye amakipe yombi asatirana cyane bigatuma urushaho  kuryoha.

Ku munota wa 34, Real Madrid yafunguye amazamu ku gitego cyatsinzwe na Gonzalo Garcia ku mupira wazamukanywe na Rodrygo, awuhindura imbere y’izamu usanga Gonzalo Garcia atsinda igitego cya mbere. 

Al Hilal ntiyacitse intege kuko nyuma y’imimota mike yazamutse neza, Raúl Asencio akorera ikosa mu rubuga rw’amahina, umusifuzi atanga penaliti.

Iyi Penaliti yinjijwe na Rúben Neves  ku munota wa 41. 

Igice cya mbere cyarangiye amakipe yombi anganya igitego 1-1.

Mu gice cya kabiri umukino wakomeje gushyuha amakipe yombi asatirana ariko kuboneza mu izamu bikagorana.

Mbere y’uko umukino urangira Umusifuzi wa Kane yongeyeho iminota irindwi y’iyongerera. 

Ku munota wa 90+1, Real Madrid yabonye penaliti ariko Federico Valverde ayiteye umunyezamu Yassine Bono ayikuramo.

Umukino warangiye Real Madrid inganyije na Al Hilal igitego 1-1, itangira nabi iri rushanwa.

Undi mukino wabaye mbere  Manchester City ifite igikombe giheruka yatsinze Wydad AC ibitego 2-0 bya Phil Foden na Jérémy Doku.

Umukino wa kabiri, Real Madrid izahura na RB Salzburg tariki ya 27 Kamena, mu gihe Man City izahura na Juventus ku wa 26 Kamena 2025.

Imikino yabaye mu rukerera rwo kuri uyu wa 19 Kamena, Juventus yanyagiye Al-Ain yo muri Leta Zunze Ubumwe z’Abarabu ibitego 5-0 mu Itsinda G naho FC Salzburg yo muri Autriche itsinda Pachuca yo muri Mexique ibitego 2-1 mu Itsinda H.

Kuri uyu wa Kane hateganyijwe imikino y’umunsi wa Kabiri mu Itsinda A aho Palmeiras yo muri Brésil ikina na Al Ahly yo mu Misiri guhera saa kumi n’ebyiri mu gihe Inter Miami yo muri Amerika ikina na FC Porto yo muri Portugal guhera saa tatu z’ijoro.