BAL 2025: US Monastir, Petro de Luanda na Kriol Star zabonye itike yo gukina imikino ya nyuma

US Monastir yo muri Tunisia, Petro de Luanda yo muri Angola na Kriol Star yo muri Cape Verde zabonye itike yo kwerekeza mu mikino ya nyuma ya Basketball Africa League (BAL) izabera i Pretoria nyuma yo kuyobora itsinda ryiswe Sahara Conference.

Imikino y’iri tsinda yari imaze icyumweru ibera i Dakar muri Senegal yasojwe ku Cyumweru tariki ya 4 Gicurasi 2025, aho yitabiriwe na US Monastir yo muri Tunisia, Petro de Luanda yo muri Senegal, Kriol Star yo muri Cape Verde na ASC Ville de Dakar yo muri Senegal.

Amakipe yose yakinnye umukino ubanza ni uwo kwishyura. Mu mikino ya nyuma yakinwe, US Monastir yatsinze ASC Ville de Dakar amanota 77-68, Kriol Star yo muri Cape Verde itsinda Petro de Luanda amanota 71-69.

Muri rusange muri iri tsinda hakinwe imikino itandatu yasojwe US Monastir iyoboye nyuma yo gutsinda imikino ine muri itandatu, Petro de Luanda ifite igikombe giheruka yatsinze itatu, itsindwa itatu iri ku mwanya wa kabiri.

Kriol Star iri ku mwanya wa gatatu yatsinze imikino itatu, itsindwa itatu mu gihe ASC Ville de Dakar iri ku mwanya wa nyuma yatsinzwe imikino ine itsinda ibiri.

Ubusazwe amakipe abiri ya mbere ni yo yabonaga itike yo gukina imikino ya nyuma, kuri iyi nshuro bitewe n’uko iri tsinda ryari rikomeye amakipe atatu ya mbere yahise abona yo kuzakina imikino ya nyuma izabera i Pretoria kuba tariki 4 kugeza 14 Kamena 2025.

Aya makipe yiyongereye kuri Al Ittihad yo mu Misiri na Rivers Hoopers yo muri Nigeria zamaze kubona itike yo gukina imikino ya nyuma zivuye mu itsinda rya Kalahari Conference.

Nyuma yo gusoza imikino ya Sahara Conference na Kalahari Conference hagiye gukinwa Nile Conference rizabera i Kigali kuva tariki ya 17 kugeza 25 Gicurasi 2025.

Ni itsinda Abanyarwanda bahanze amaso cyane kuko ririmo APR BBC ihagarariye u Rwanda aho iri kumwe na Al Ahli Tripoli yo muri Libya, Nairobi City Thunder muri Kenya na Made by Basketball yo muri Afurika y’Epfo.

Mu mwaka ushize, Ikipe y’Ingabo yitwaye nabi cyane muri iri rushanwa, inanirwa kugera mu mikino ya nyuma yabereye i Kigali. Kuri ubu, itangaza ko intego ari ukwisubiraho ikazagera kure hashoboka.

Irushanwa riheruka ryegukanywe na Petro de Luanda yo muri Angola, iba ikipe ya mbere yo munsi y’ubutayu bwa Sahara iryegukanye kuva ryatangira gukinwa mu 2020.