Arsenal yirangayeho, Liverpool irakoza imitwe y’intoki ku Gikombe cya 20 cya Premier League

Arsenal yanganyije na Brentford igitego 1-1, yongera gutakaza amahirwe yo kwegukana Igikombe cya Shampiyona imaze hafi imyaka 20 yifuza kongera guterura.

Uyu mukino wabaye ku wa Gatandatu, tariki 12 Mata 2025 Arsenal yagiye gukina uyu mukino isabwa kudakora ikosa kugira ngo igabanye ikinyuranyo cy’amanota menshi yarushwaga na Liverpool ya mbere ku rutonde rwa shampiyona.

Muri uyu mukino, igice cya mbere cyarangiye amakipe yombi anganya 0-0.

Mu gice cya kabiri, Arsenal yatangiranye imbaraga nyinshi, bidatinze ku munota wa 61, ifungura amazamu ku gitego cyatsinzwe na Thomas Partey ku mupira mwiza na Declan Rice.

Ku munota wa 74, Brentford yishyuye igitego gitsinzwe na Yoane Wisaa ku mupira yahawe na Nathan Colins mu rubuga rw’amahina.

Arsenal yakomeje gusatira ishaka igitego cy’intsinzi ari na ko ikora impinduka zitandukanye, ariko ntibigire icyo bitanga.

Umukino warangiye amakipe yombi anganyije igitego 1-1, Arsenal inganya umukino wa kabiri wikurikiranya mu rugamba rwo guhatanira igikombe cya Shampiyona.

Kunganya uyu mukino kwatumye amahirwe yayo yo kwegukana Igikombe cya Shampiyona y’u Bwongereza ayoyoka ku kigero cyo hejuru, kuko ubu Liverpool ya mbere iyirusha amanota 13, mu gihe habura itandatu ngo Premier League igere ku musozo.

Liverpool irakoza imitwe y’intoki ku Gikombe cya 20 cya shampiyona

Liverpool yatsinze West Ham United ibitego 2-1 times ikomeza kwanikira Arsenal iyikurikiye.

Uyu mukino wabaye ku Cyumweru tariki ya 13 Mata 2025.

Muri uyu mukino Liverpool yatangiye neza, bidatinze ku munota wa 18 yafunguye amazamu ku gitego cyatsinzwe na Louis Diaz ku mupira mwiza yahawe na Mohamed Salah.

Mohammed Salah yashyize agahigo kuba umukino wa mbere muri Premier League igize uruhare mu bitego 38 mu mwaka umwe w’imikino harimo ibitego 27 n’imipira ivamo ibitego 18.

Igice cya mbere cyarangiye Liverpool iyoboye umukino n’igitego 1-0.

Mu gice cya mbere cya kabiri, Liverpool yakomeje gushaka cya kabiri abakinnyi na Mohamed Salah na Diego Jota babona uburyo imbere y’izamu.

Ku munota wa 86, West Ham United yabonye igitego cyo kwishyura cyatsinzwe na Andrew Robertson ku mupira wahinduwe imbere y’izamu na Aron Wanbissaka.

Nyuma yo gutsindwa igitego, Liverpool yagarutse mu mukino itangira gushaka igitego cy’intsinzi, bidatanze ku munota wa 89, yabonye igitego cya kabiri cyatsinzwe na Kapiteni Virgil Van Dijk n’umutwe ku mupira wavuye muri Koruneri yatewe na Mac Allister.

Umukino warangiye Liverpool yatsinze West Ham United ibitego 2-1.

Gutsinda uyu mukino kandi byongereye Liverpool amahirwe yo kwegukana igikombe cya 20 cya Shampiyona, aho isabwa gutsinda umukino wa shampiyona izakirwamo na Leicester City ku wa 20 Mata 2025 ikegukana igikombe cya shampiyona.

Liverpool izahita iba ikipe ya kabiri muri Shampiyona y’u Bwongereza ifite ibikombe 20 nyuma ya Manchester United yari ifite ako gahigo.