#WC2026: U Bwongereza bwegukanye umwanya wa 3, Mbappé yandika amateka mashya

Ikipe y’Igihugu y’u Bwongereza yegukanye umwanya wa gatatu mu mikino y’Igikombe cy’Isi cya 2026, nyuma yo gutsinda u Bufaransa ibitego 6-4 mu mukino wabereye kuri Hard Rock Stadium iherereye mu Mujyi wa Miami muri Leta Zunze Ubumwe za Amerika, mu ijoro ryo ku wa 18 Nyakanga.

U Bwongereza ni bwo bwatangiye neza umukino, bidatinze ku munota wa gatatu Declan Rice yafunguye amazamu ku ishoti rikomeye yatereye hanze y’uburuga rw’amahina, umunyezamu Mike Maignan ananirwa kuwukoraho ujya mu izamu. 

Nyuma yo gutsindwa igitego, u Bufaransa bwinjiye mu mukino butangira gusatira bushaka igitego cyo kwishyura binyuze mu bakinnyi barimo Rayan Cherki na Kylian Mbappé. 

Ku munota wa 18, myugariro Ezri Konsa yatsinze igitego cya kabiri cy’u Bwongereza n’umutwe, ku mupira mwiza wavuye kuri koruneri Declan Rice yateye. 

Ku munota wa 35, Kylian Mbappé yashoboraga kugabanya ikinyuranyo binyuze ku ishoti rikomeye yatereye mu rubuga rw’amahina, ku mahirwe make umupira ushyirwa muri koruneri itagize icyo itanga. 

Ku munota wa 37, Bukayo Saka yatsinze igitego cya gatatu cy’u Bwongereza ku mupira mwiza yahawe na Marcus Rashford. 

Ku munota wa 45+1’ Bukayo Saka yatsinze igitego cya kane ku mupira mwiza yacomekewe na Eberechi Eze, ahita awushyira mu rushundura. 

Igice cya mbere cyarangiye u Bwongereza butsinze u Bufaransa ibitego 4-0.

Igice cya kabiri, umutoza w’u Bufaransa yatangiranye impinduka enye, Theo Hernandez, Ibrahima Konate, Rayan Cherki na Desire Doue basimburwa na Lucas Digne, Dayot Upamecano, Ousmane Dembélé na Bardley Barcola.

Izi mpinduka zafashije iyi kipe kongera imbaraga mu busatirizi, bidatinze ku munota wa 48 Kylian Mbappé yatsinze igitego cya mbere cy’impozamarira ku mupira yahawe na Michael Olise, awushyira mu izamu. 

Ku munota wa 54, Bardley Barcola yatsindiye u Bufaransa igitego cya kabiri cyo kwishyura ku mupira mwiza yacomekewe na Kylian Mbappé, asiga ba myugariro ahita awushyira mu rushundura.

Iyi kipe yakomeje gusatira cyane ishaka kugabanya ikinyuranyo ndetse ku munota wa 66, Kylian Mbappé yatsinze igitego cya gatatu cyo kwishyura ku mupira yahawe na Michael Olise, ahita awushyira mu izamu. 

Ku munota wa 85, u Bwongereza bwabonye Penaliti ku ikosa Djed Spence yakorewe mu rubuga rw’amahina na Malo Gusto. 

Iyi Penaliti yinjijwe neza na Bukayo Saka atsindira u Bwongereza igitego cya gatanu bituma yuzuza ibitego bitatu mu mukino. 

Ku munota wa 90+6’ Ousmane Dembélé yatsindiye u Bufaransa igitego cya kane ku ishoti rikomeye yatereye mu rubuga rw’amahina, ku mupira mwiza Dayot Upamecano yamuhaye, umunyezamu Dean Henderson ananirwa kuwukuraho ujya mu izamu. 

Nyuma y’iminota ibiri, Jude Bellingham yatsindiye u Bwongereza igitego cya gatandatu nyuma yo gucenga ba myugariro n’umunyezamu w’u Bufaransa. 

Umukino warangiye u Bwongereza butsinze u Bufaransa ibitego 6-4, bwegukana umwanya wa gatatu mu Gikombe cy’Isi, uba umwanya mwiza basorejeho bwa mbere kuva mu 1966 ubwo begukanaga iri rushanwa.

Kugeza ubu yu mukino wabaye uwa mbere wabonetsemo ibitego byinshi muri iki Gikombe cy’Isi cya 2026.

Uyu mukino wasinze Kylian Mbappé akuyeho agahigo ka Lionel Messi ko gutsinda ibitego byinshi mu mateka y’Igikombe cy’Isi.

Uyu Mufaransa watsinze ibitego bibiri, yahise ageza ibitego 22 arusha kimwe Lionel Messi.

Messi ashobora kongera ibitego bye mu mukino wa nyuma w’Igikombe cy’Isi uhuza Argentine na Espagne kuri iki Cyumweru, guhera saa tatu z’ijoro isaha ya Kigali.