Bwa mbere FC Barcelona yatsinze Real Madrid yegukana La Liga ya 29 

Ikipe ya FC Barcelone yatsinze mukeba Real Madrid ibitego 2-0 yegukana Igikombe cya Shampiyona ya Espagne (La Liga) y’uyu mwaka w’imikino wa 2025/26 ikaba yagitwaye ku nshuro ya 29. 

Iyi kipe yabigezeho mu ijoro ryo ku Cyumweru tariki ya 10 Gicurasi 2026, mu mukino wabereye kuri Stade ya Sporfiy Coup Nou.

Real Madrid imaze iminsi irimo ikibazo cy’imyitwarire mibi y’abakinnyi ntabwo yari ifite rutahizamu Kylian Mbappé. 

Uyu mukino w’umunsi wa 35 wa La Liga, Barcelone yagiye kuwukina ikeneye inota rimwe ikegukana Igikombe cya Shampiyona ku nshuro ya kabiri yikurikiranya habura imikino ibiri ngo irangire.

FC Barcelona yari imbere y’abafana bayo ni yo yatangiye neza umukino; bidatinze ku munota wa cyenda Marcus Rashford yafunguye amazamu ku mupira uteretse yatereye hanze y’uburuga rw’amahina, uruhukira mu izamu.

Iyi kipe yakomeje gukina neza maze ku munota wa 18 Ferran Torres atsinda igitego cya kabiri ku mupira mwiza Dani Olmo yamuhaye awushyira mu rushundura. 

Mu minota 20, Real Madrid yinjiye mu mukino itangira gusatira harimo uburyo bw’igitego bwahushijwe na Gonzalo Garcia wasigaranye wenyine n’umunyezamu Joan Garcia, ariko ateye umupira unyura ku ruhande.

Igice cya mbere cyarangiye FC Barcelona itsinze Real Madrid ibitego 2-0. 

Mu igice cya kabiri, umukino wagabanyije umuvuduko, umupira ukinirwa cyane hagati mu kibuga bituma n’uburyo bwo kurema igitego buba buke cyane. 

Ku munota wa 64, Vinícius Júnior yashoboraga kubonera igitego Real Madrid, ariko umunyezamu wa FC Barcelone aratabara mu gihe kandi iyi kipe yari yasuye yakomeje guhusha uburyo butandukanye.

Ku munota wa 70, Bellingham yatsinze igitego cya mbere cya Real Madrid ariko umusifuzi avuga ko habayeho kurarira nticyemerwa.

Umukino warangiye FC Barcelona itsinze Real Madrid ibitego 2-0.

Iyi kipe yahise igira amanota 91 irusha Real Madrid ya kabiri amanota 14 kandi hasigaye imikino itatu gusa bityo yegukana Igikombe cya Shampiyona ya Espagne, La Liga, ku nshuro ya kabiri yikurikiranya kiba icya 29 itwaye mu mateka. 

Yari inshuro ya mbere ikipe itwariye igikombe kuri uyu mukino uhuza abakeba bo muri Espagne bwa mbere mu myaka 97 ishize.