Volleyball: APR VC na Kepler VC zatangiye neza imikino ya Kamarampaka

APR VC yatsinze REG VC amaseti 3-1 (25-23, 20-25, 17-25, 27-29) naho Kepler VC itsinda Police VC amaseti 3-1 (25-23, 22-25,30-28, 25-17), amakipe yombi abona intsinzi ya mbere mu mikino ya nyuma ya kamaparamaka.

Iyi mikino ya kamarampaka yatangiye ku wa Gatanu, tariki 17 Gicurasi 2024 muri Ecole Belge de Kigali ku Gisozi.

Muri iyi mikino ya kamarampaka, amakipe azakina mu buryo bw’umwiza muri itatu (Best of three) aho amakipe atanguranwa intsinzi ebyiri.

Umukino wabanje REG VC yatangiye neza umukino maze itsinda iseti ya mbere ku manota 25-23.

Mu iseti ya kabiri, APR VC yagabanyije amakosa yayiranze mu iseti ya mbere nko kugarira nabi.

Ibi byaje gufasha APR VC gutwara iseti ya mbere yayo, ikaba iseti ya kabiri y’umukino ku manota 25-20.

Mu iseti ya Gatatu, APR VC yakomeje kwitara neza nkuko mu iseti ya kabiri maze iyegukana biyoroheye ku manota 25 kuri 17 ya REG.

Iseti ya kane y’umukino yari nk’iseti ya kamarampaka kuko APR VC yasabwaga kuyitsinda igacyura intsinzi cyangwa REG VC ikayitsinda hakiyambazwa iseti ya kamarampaka.

Umutoza wa REG VC ukomoka muri Cameroon Mboulet yakoze impinduka muri iyi seti maze akuramo Niyogisubizo Samuel uzwi nka ‘Taison’ (Hitter) ashyiramo Fred uzwi nka ‘Mbogo’, akuramo kandi Thon Magembo (hitter) ashyiramo Akumuntu Kavalho.

Izi mpinduka ntizigeze zigira icyo zifasha REG VC kuko n’ubwo byasabye ko hiyambazwa amanota y’inyongera, iseti yaje kurangira APR VC iyitwaye n’amanota 29-27 yegukana itsinze ya mbere muri iyi mikino ya Playoffs.

Mu mukino wakurikiyeho Kepler yatsinze Police VC amaseti 3-1.

Muri uyu mukino Police VC ni yo yahabwaga amahirwe yo gutsinda uyu mukino cyane ko mu mikino 5 yaherukaga guhuza aya makipe yatsinzemo imikino 3, igatsindwa 2.

Police VC yatangiye ariyo iri hejuru ndetse yegukana iseti ya mbere itsinze amanota 25-23.

Mu iseti ya kabiri, Kepler VC yaje ifite ishyaka ryinshi ryo kwishyura iseti yari imaze gutsindwa ndetse byaje kuyikundira cyane kuko yayitsinze ku manota 25-22.

Iseti ya gatatu y’umukino yari ikomeye ku mpande zombi, yaje no gusaba ko amakipe yisobanura mu manota y’inyongera kuko iseti yarangiye ari amanota 30 ya Kepler VC kuri 28 ya Police VC.

Police VC yagenze imbere muri iyi seti, bigeze mu manota ya nyuma, passeur Crispin yahaye imipira 3 ikurikirana Kwizera Eric uzwi nka ‘Kiganza’ ngo akore inota ariko biranga.

Byaje kurangira Kepler VC yegukanye iyi seti.

Iseti ya kane yoroheye cyane Kepler VC kuko yayitwaye ku manota 25-17, Police VC itakaza umukino wa mbere ityo mu gihe abafana ba Kepler VC bari benshi ku kibuga bishimira itsinzi yabo ya mbere.

APR WVC na Police WVC zatangiye neza

Mu bagore, APR WVC yabonye iya mbere itsinze Muhanga WVC amaseti 3-0 (25-16, 25-11, 25-15).

Undi mukino police WVC yatsinze na Rwanda Revenue Authority amaseti 3-2 (25-21, 18-25, 13-25, 25-22, 15-12).

Umunsi wa kabiri w’iyi mikino ya kamarampaka uteganyijwe kuri uyu wa Gatandatu tariki 18 Gicurasi 2024 muri Ecole Belge de Kigali ku Gisozi.