UEFA Champions League: Real Madrid yigaranzuye Manchester City (Amafoto)

Real Madrid yatsinze Manchester City ibitego 3-2 mu mukino ubanza wa kamarampaka muri UEFA Champions League itera intambwe igana muri ⅛ cy’irangiza.

Uyu mukino wabaye mu Ijoro ryo ku wa Kabiri tariki ya 11 Gashyantare 2025, kuri Etihad Stadium mu Mujyi wa Manchester mu Bwongereza. 

Umukino watangiranye ingufu ku ruhande rwa Real Madrid, dore ko yakiniraga mu rubuga rwa Man City ndetse mu minota 10 ya mbere yari yamaze kurema uburyo bugera kuri buta bw’igitego ariko yirangaraho.

Gutinda kubona izamu kwa Kylian Mbappé na Vinicius Jr bari bayoboye ubusatirizi bwayo, byakanguye abakinnyi ba Manchester City batangira kwinjira mu mukino.

Ku munota wa 19’ Manchester City yafunguye ku gitego cyatsinzwe na rutahizamu Erling Haaland, wahererekanyije neza na Joško Gvardiol kugeza bageze mu rubuga rw’amahina.

Real Madrid ya Carlo Ancelotti yashatse kwishyura mu gice cya mbere ariko bikomeza kwanga kugeza amakipe yombi agiye mu karuhuko Manchester City iyoboye umukino n’igitego 1-0. 

Igice cya kabiri Real Madrid yacyinjiranyemo imbaraga yinshi cyane ndetse isatira bikomeye izamu rya Manchester City kugeza ibonye igitego ku munota wa 59 cyinjijwe na Kylian Mbappé.

Iki gitego cyongeye gukangura Man City ndetse inabona penaliti ku munota wa 75, ubwo Phil Foden yinjiraga mu rubuga rw’amahina ariko bikarangira Federico Valverde amushyize hasi.

Iyi yavuyemo igitego cya kabiri cya Haaland muri uyu mukino ku munota wa 80. Ancelotti yahise akora impinduka akuramo Dani Ceballos, ashyiramo Luka Modrić.

Abakinnyi be bahise bishyura mu minota itanu ku gitego cyatsinzwe na Brahim Diaz abifashijwemo na Vinicius Junior, ndetse na Jude Bellingham ashyiramo icy’agashinguracumu ku munota wa kabiri w’inyongera ari na cyo cyahesheje intsinzi Real Madrid.

Umukino warangiye Real Madrid itsinze Manchester City ibitego 3-2 mu mukino ubanza wa Kamparamaka.

Umukino wo kwishyura uteganyijwe ku wa Gatatu tariki 19 Gashyantare 2025, kuri Santiago Bernabeau mu Mujyi wa Madrid muri Espagne. 

Mu yindi mikino yabaye, Brest yatsinzwe na PSG ibitego 3-0, Juventus itsinda PSV ibitego 2-1 mu gihe Sporting yatsinzwe na Borussia Dortmund ibitego 3-0.

Indi mikino yo gushaka itike ya ⅛ cy’iri rushanwa, irakomeza kuri uyu wa Gatatu tariki ya 12 Gashyantare 2025 

Club Brugge vs Atalanta

AS Monaco vs Benifa 

Celtic Vs Bayern Munchen 

Feyenoord Vs AC Milan