UEFA Champions League: Real Madrid yatsinze Atletico, Arsenal inyagira PSV 

Real Madrid yatsinze Atletico ibitego 2-1 naho Arsenal yanyagiye PSV Eindhoven ibitego 7-1 mu mikino ibanza ya ⅛ cya UEFA Champions League.

Iyi mikino yabaye mu ijoro ryo ku wa Kabiri tariki ya 4 Werurwe 2025.

Umukino wari witezwe n’abakunzi ba Ruhago ni uwahuje Real Madrid na Atletico Madrid zombi zo muri Espagne.

Uyu mukino watangiye wihuta, Real Madrid itangirana igitego cyatsinzwe na Rodrygo ku munota wa kane, nyuma yo kuzamuka yihuta agatera ishoti rikomeye.

Mu minota 20, umukino watuje ukinirwa cyane mu kibuga hagati n’uburyo bw’ibitego buragabanyuka.

Ku munota wa 32, Julián Alvarez yafashe icyemezo azamuka yihuta acenga Eduardo Camavinga, atera ishoti rikomeye ryo mu nguni yishyurira Atlético de Madrid igitego cya mbere.

Igice cya mbere cyarangiye amakipe yombi anganya 1-1.

Real Madrid yongeye gutangirana imbaraga, ku munota wa 55, Brahim Diaz yatsinze igitego cya kabiri cyiza, acenze ba myugariro batatu ba Atlético de Madrid.

Mu minota 70, umukino wongeye gutuza, ari na ko amakipe yombi yakoraga impinduka ariko agasatirana bidakanganye.

Mu minota ya nyuma, Real Madrid yagerageje gusatira ishaka igitego cya gatatu ariko Kylian Mbappé, Vinicius Junior na Luka Modrić barabihusha.

Umukino warangiye Real Madrid itsinze Atlético de Madrid ibitego 2-1.

Indi mikino yabaye ku wa Kabiri yasize, Arsenal inyagiye PSV Eindhoven yo mu Buholandi ibitego 7-1, Club Brugge yatsinzwe na Aston Villa ibitego 3-1, Borussia Dortmund yo inganya na Lille igitego 1-1. 

Indi mikino ya 1/8 irakinwa kuri uyu wa Gatatu tariki ya 5 Werurwe 2025:

Feyenoord vs Inter Milan 

Benfica vs FC Barcelona 

Bayern Munchen vs Bayern Leverkusen 

PSG vs Liverpool