UEFA Champions League: Real Madrid na Manchester City zageze muri 1/4

Ikipe ya Real Madrid yanganyije na RB Leipzig igitego 1-1 naho Manchester City itsinda FC Copenhagen ibitego 3-1 zombi zibona itike ya 1/4 muri UEFA Champions League.

Ku mugoroba wo ku Gatatu tariki 05 Werurwe 2024 ni  bwo hakinwe Indi mikino yo kwishyura ya 1/8 muri UEFA Champions League.

Ku kibuga Santiago Bernabéu, Real Madrid yari yakiriye RB Leipzig mu mukino utoroheye iyi kipe yari imbere y’abafana bayo muri Espagne.

RB Leipzig yasatiriye cyane ndetse yashoboraga gufungura amazamu binyuze ku bakinnyi bayo barimo Dani Olomo, Xavi Simon ndetse na Lois Opend, ariko Umunyezamu wa Real Madrid, Andriy Lunin agatabara.

Real Madrid nk’ikipe nkuru ndetse yari imbere y’abafana bayo, yafunguye amazamu ku munota wa 65 ku gitego cyatsinzwe na Vinícius Júnior nyuma guhabwa umupira na Jude Bellingham.

Nyuma y’iminota itatu gusa, ibyishimo bya Real Madrid ntibyarambye kuko Willi Orban yahise yishyurira RB Leipzig ku mupira yahawe na David Raum.

Abakinnyi b’iyi kipe yo muri Espagne bihagazeho bijyanye n’imipira bakizaga imbere y’izamu ubwo RB Leipzig yashakaga igitego cya kabiri, ariko iminota yose y’umukino irangira ari 1-1.

Real Madrid yahise ikomeza muri 1/4 ku giteranyo cy’ibitego 2-1 kubera ko mu mukino ubanza yari yatsinze igitego 1-0 cya Brahim Diaz.

Mu mukino wundi  kuri Etihad stadium Manchester City yari yakiriye FC Copenhagen yo muri Denmark.

Uyu mukino warangiye Manchester City itsinze FC Copenhagen ibitego 3-1 mu mukino utayigoye cyane.

Manchester City ni yo yafunguye amazumu ku gitego cyatsinzwe na Emmanuel Akanji ku munota wa gatanu gusa ahawe umupira na Julián Álvarez maze nyuma y’iminota ine, uyu Munya -Argentine atsinda icya kabiri.

Ku wa 29, Elyounoussi wa Copenhagen na we yatsinze igitego ku mupira yahawe na Orri Oskarsson, ariko ubwo igice cya mbere cyari kigiye kurangira, Erling Haaland atsinda igitego cya gatatu cya Manchester City ku mupira yahawe na Rodri.

Muri rusange, iyi kipe yo mu Bwongereza yasezereye FC Copenhagen iyitsinze igiteranyo cy’ibitego 6-2 mu mikino ibiri yombi.

Real Madrid na Manchester City ziyongereye kuri Paris Saint-Germain na Bayern Munich zabonye itike ya 1/4 ku wa Kabiri.