UEFA Champions League: Bigoranye, Real Madrid yasezereye Atletico Madrid 

Arsenal, Aston Villa, Borussia Dortmund, na Real Madrid yigaranzuye Atletico Madrid bigoranye mu mukino wo kwishyura wa 1/8 cya UEFA Champions League, zabonye itike ya 1/4.

Mu ijoro ryo ku wa Gatatu , tariki ya 12 Werurwe 2025, ni bwo hakinwe indi imikino ine yo kwishyura ya ⅛ cy’iri rushanwa ry’amakipe y’ibigugu i Burayi.

Umukino wabimburiye indi ni uwahuje Lille yo mu Bufaransa yari yakiriye Borussia Dortmund yo mu Budage.

Umukino ubanza amakipe yombi yanganyije igitego 1-1 .

Uyu mukino wo kwishyura warangiye Borussia Dortmund yatsinze ibitego 2-1, iyisezerera ku giteranyo cy’ibitego 3-2 mu mikino yombi ibona  itike ya ya ¼, cy’irangiza.

Umukino wari ukomeye kurusha indi ni uwahuje Atletico Madrid na Real Madrid zombi zo muri Espagne, bihurira ku kibuga cya Civitas Metropolitano.

Ubwo aya makipe yombi aheruka guhura, Real Madrid yatsinze Atletico Madrid ibitego 2-1.

Atlético de Madrid yatangiranye igitego cyo ku munota wa mbere, aho Rodrigo de Paul yazamukanye umupira neza awuhindura imbere y’izamu, usanga Conor Gallagher afungura amazamu.

Umukino wahise usubira ibubisi kuko amakipe yombi yahise anganya ibitego 2-2.

Mu minota 20, Real Madrid yihariye umupira cyane ari na ko isatira, ariko ab’inyuma ba Atlético bakabyitwaramo neza.

Mu minota 30, Atlético yakinaga nk’iyugarira yatangiye gufungura umukino irasatira ariko umunyezamu Thibaut Courtois abera ibamba Julian Álvares wageragezaga uburyo bwinshi bw’ibitego.

Igice cya mbere cyarangiye Atlético de Madrid itsinze Real Madrid igitego 1-0.

Iyi kipe yari mu rugo yakomeje gukina neza no mu gice cya kabiri ariko igahusha uburyo bwinshi bw’ibitego.

Ku munota wa 70, Kylian Mbappé yazamukanye umupira neza acenga myugariro Clement Lenglet amukururira mu rubuga rw’amahina, umusifuzi atanga penaliti.

Yahawe Vinicius Junior ariko ayiteye arayamurura, umupira ujya hejuru cyane y’izamu.

Mu minota 80, Real Madrid yasatiriye bikomeye ishaka kwishyura igitego ariko gikomeza kubura.

Iminota 90 isanzwe y’umukino yarangiye Atlético de Madrid itsinze Real Madrid igitego 1-0, amakipe yombi akomeza kunganya 2-2, bityo hashyirwaho 30 y’inyongera.

Iyi minota na yo yarangiye nta kipe yongeye kureba mu izamu bityo hitabazwa penaliti.

Real Madrid yazitwayemo neza itsinda 4-2 isezerera mukeba muri ⅛ cya UEFA Champions League.

Indi mikino yabaye kuri uyu Gatatu, Arsenal yanganyije na PSV Eindhoven ibitego 2-2 ariko iyisezerera ku giteranyo cy’ibitego 9-3.

Aston Villa yatsinze Club Brugge ibitego 3-0, iyisezerera ku giteranyo cy’ibitego 6-1. 

Imikino ibanza ya ¼ iteganyijwe tariki ya 8 na 9 Mata, mu gihe iyo kwishyura ari ku ya 15 na 16 Mata 2025

Uko amakipe azahura muri 1/4 

Barcelona vs Dortmund 

PSG vs Aston Villa

Bayern Munchen vs Inter Milan 

Arsenal vs Real Madrid