U Rwanda rwagumye ku mwanya rwariho ku rutonde rwa FIFA

Ikipe y’Igihugu y’u Rwanda “Amavubi” yagumye ku mwanya wa 131 ku rutonde rw’Ishyirahamwe ry’Umupira w’Amaguru ku Isi (FIFA) rwasohotse kuri uyu wa Kane tariki ya 18 Nyakanga 2024.

Ikipe y’u Rwanda yari kuri uyu mwanya ku rutonde rwaherukaga gusohoka muri Kamena 2024.

Ikipe y’Igihugu iheruka gukina muri Kamena uyu mwaka mu gushaka itike y’igikombe cy’Isi cya 2026 kizabera Canada, Mexico na Leta Zunze Ubumwe z’Amerika.

Muri iyi mikino Amavubi yatsinzwe na Benin igitego 1-0 mu mukino wabereye Côte d’Ivoire ndetse atsinda Lesotho igitego 1-0 cyatsinzwe na Jojea Kwizera mu mukino wabereye muri Afurika y’Epfo.

Urutonde rwashyizwe hanze n’Ishyirahamwe ry’Umupira w’Amaguru ku Isi (FIFA), kuri uyu wa 18 Nyakanga, rugaragaza ko u Rwanda ruri mu bihugu bitanyeganyeze kuko rwagumye ku mwanya wa 131 rugumana amanota 1114.15.

Uru rutonde rushya rugaragaza ko habayeho impinduka mu bihugu 10 bya mbere ku Isi ugereranyije n’ukwezi kwa Kamena, urutonde ruyobowe na Argentine ikurikiwe n’u Bufaransa, Espagne, u Bwongereza, Brazil, u Bubiligi, u Buholandi, Portugal, Colombia n’u Butaliyani.

Argentine iheruka kwegukana Copa America ya 16 yakomeje kuyobora uru rutonde yiyongeraho amanota 41.34.

Ikipe y’igihugu ya Espagne iheruka kwegukana igikombe cy’u Burayi itsinze u Bwongereza ku mukino wa nyuma yafashe umwanya wa gatatu ivuye ku mwanya wa munani yiyongeraho amanota 105.75.

Colombia yatsinzwe na Argentine ku mukino wa nyuma wa Copa America, akaba ari cyo gihugu gishya cyaje mu mu bihugu 10 bya mbere aho kiri ku mwanya wa cyenda kivuye ku mwanya 12 cyiyongeraho amanota  57,88.

Ibihugu 10 bya mbere muri Afurika ni Maroc (ya 14), Sénégal (19), Misiri (36), Côte d’Ivoire (38) Nigeria (39), Tunisia (41), Algeria (46), Cameroun (51), Mali (53), Afurika y’Epfo (57).

Mu bihugu bituranye n’u Rwanda, Repubulika Iharanira Demokarasi ya Congo ni iya 60, Uganda (95), Kenya (108), Tanzania (113) n’u Burundi (139).

Urutonde rutaha ruzasohoka ku wa 19 Nzeri 2024.