Tennis: Jannik Sinner yahagaritswe amezi atatu

Umutayilani Jannik Sinner usanzwe ari nimero ya mbere ku Isi muri Tennis, yahagaritswe amezi atatu kubera gukoresha ibyongerambaraga bitemewe muri siporo.

Iki cyemezo cyatangajwe kuri uyu wa Gatandatu tariki ya 15 Gashyantare 2025 n’Urwego rushinzwe kurwanya imiti yongera imbaraga ku Isi (World Anti-Doping Agency – WADA) nyuma yo gupima uyu mukinnyi inshuro 2 mu mwaka ushize wa 2024.

Ku nshuro ya mbere uyu mukinnyi yapimwe muri Mata 2024, agasangwamo ikigero kiri hejuru cy’imiti yongera imbaraga mu mubiri we izwi nka ‘Clostebol’, ariko yiyemeza kujurira kuko atemeranyaga n’ibisibuzo byatanzwe.

Iki gihano kizubahirizwa hagati y’itariki 9 Gashyantare n’itariki 4 Gicurasi 2025. Bivuze ko uyu mukinnyi azemererwa gukina Roland Garros (French Open) iteganyijwe tariki 19 Gicurasi.

Jannik ahagaritswe nyuma yaho muri Mutarama yegukanye Australian Open ya 2025 atsinze Umudage Alexander Zverev amaseti 3-0 ku mukino wa nyuma.

Uyu Mutaliyani yegukanye amarushanwa akomeye arimo Gland Slam eshatu zirimo Australian Open inshuro ebyiri zikurikiranya 2024, 2025 na US Open.