Rayon Sports yatsinze Police FC itangirana itsinzi mu mwaka wa 2025

Rayon Sports yatsinze Police FC ibitego 2-0 mu mukino w’ikirarane w’umunsi wa 14 utarabereye igihe, ikomeza gushimangira umwanya wa mbere ku rutonde rwa shampiyona.

Uyu mukino wabaye ku mugoroba wo kuri uyu wa Gatandatu tariki 4 Mutarama 2025, kuri Kigali Pele Stadium.

Rayon Sports yatangiye umukino isatira izamu rya Police FC harimo uburyo bwabonetse ku munota wa 6 ku mupira Ishimwe Fiston yambukiranye mu kibuga, atanga umupira kuri Serumogo Ali wawuhinduye mu izamu, ushyirwa muri koruneri na Yakubu Issah itagize ikivamo.

Ku munota wa 9, Rayon Sports yahushije uburyo bw’igitego bwabazwe ku mupira mwiza Fall Ngagne yacomekewe asiga myugariro Yakubu wari hasi, atera ishoti rikomeye rikuwemo na Niyongira Patience, asubijemo umupira na bwo ukurwamo n’uyu munyezamu wahise atabarwa na bagenzi be.

Ku munota wa 23, Rayon Sports yakoze impinduka Iraguha Hadji asimbura Muhire Kevin wari wagize ikibazo cy’imvune.

Ku munota wa 25, Rayon Sports yongeye kubona amahirwe imbere y’izamu ku mupira mwiza Adama Bagayogo yahinduye mu rubuga rwa Police FC, ukurwaho na Yakubu, ugarukiye Bugingo ateye ishoti rijya ku ruhande.

Ku munota wa 44, Nsabimana Eric ‘Zidane’ yakijije izamu rya Police FC ku mupira akuye mu izamu nyuma yo gushyirwaho umutwe na Diagne uvuye muri koruneri.

Mbere y’uko igice cya mbere kirangira, umusifuzi wa kane yongeyeho iminota ine y’inyongera.

Ku munota wa 45+1, Rayon Sports yafunguye amazamu ku gitego cyatsinzwe na Youssou Diagne ku mupira yashyize mu izamu aserebetse nyuma yo guhindurwa na Fall Ngagne mu rubuga rw’amahina.

Igice cya mbere cyarangiye Rayon Sports iyoboye umukino n’igitego 1-0 cyatsinzwe na Youssu Diagne.

Mu gice cya kabiri, Police FC yatangiranye impinduka ebyiri Nsabimana Eric ‘Zidane’ na Hakizimana Muhadjiri basimburwa na Mugisha Didier na Iradukunda Simeon.

Ku munota wa 55, Rayon Sports yashoboraga kubona igitego cya kabiri nyuma yaho Fall Ngagne acenze ba myugariro ba Police FC ku murongo w’urubuga rw’amahina, acomekera umupira Ishimwe Fiston wawinjiranye  imbere, awutera hanze.

Ku munota wa 62, Rayon Sports yatsinze igitego cya kabiri ku mupira Adama Bagayogo yinjiranye mu rubuga rw’amahina, awuhinduye mu izamu Shami Carnot aritsinda.

Ku munota wa 69, Police FC yahushije uburyo bwiza bwo kwishyura igitego ku mupira Ani Elijah yahawe mu rubuga rw’amahina, awufunze, ahindukira byihuse atera ishoti ryagiye hejuru gato y’izamu.

Ku munota wa 80, Police FC yahushije uburyo bwabazwe bw’igitego ku mupira Ani Elijah yahinduye mu rubuga rw’amahina, usanga Msanga Henry wawuteye ukurwamo na Khadime Ndiaye, awusubijemo n’umutwe ujya hejuru y’izamu.

Ku munota wa 88, Shami Carnot wa Police FC yahawe ikarita ya kabiri y’umuhondo, ku ikosa yari akoreye kuri Aziz Bassane inyuma y’urubuga rw’amahina.

Mbere y’uko urangira umusifuzi wa kane, Nsabimana Celestin, yongeyeho iminota itandatu y’inyongera.

Police FC yakomeje gushaka igitego cyo kwishyura ba myugariro ba Rayon Sports bakomeza guhagarara neza. ku munota wa 90+1.

Umukino warangiye Rayon Sports itsinze Police FC ibitego 2-0 itangirana itsinzi umwaka wa 2025.

Rayon Sports yakomeje kuyobora urutonde rwa shampiyona n’amanota 36 mu mikino 14 imaze gukina.

Police FC yasoje imikino ibanza ya Shampiyona iri ku mwanya wa kane n’amanota 23.

Rayon Sports izagaruka mu kibuga ku Cyumweru tariki 11 Mutarama 2025 yakirwa na Mukura VS &L mu mukino w’ikirarane w’umunsi wa 15 wa Shampiyona.

Abakinnyi babanje mu kibuga ku mpande zombi

Rayon Sports

Khadime Ndiaye, Youssu Diagne, Omar Gning, Serumogo Ali, Bugingo Hakim, Kanamugire Roger

Muhire Kevin (c), Ndayishimiye Richard, Fall Ngagne, Ishimwe Fiston na Adama Bagayogo.

Police FC

Niyongira Patience, Yakubu Issah, Msanga Henry, Ishimwe Christian, Chukwuma Odili, Hakizimana Muhadjiri, Nsabimana Eric (c), ChimezIe David, Bigirimana Abedi, Sibomana Shami Carnot na Ani Elijah.