Rayon Sports yatsinze AS Kigali ikomeza gushimangira umwanya wa mbere (Amafoto)

Rayon Sports yatsinze AS Kigali ibitego 2-1 mu mukino w’umunsi wa 21 wa Shampiyona, ikomeza gushimangira umwanya wa mbere ku rutonde rwa shampiyona.

Uyu mukino wabaye ku mugoroba wo kuri uyu wa Gatandatu tariki ya 15 Werurwe 2025, kuri Kigali Pele Stadium.

Rayon Sports yagiye muri uyu mukino ishaka intsinzi yo kuyifasha gusiga mukeba wayo APR FC irusha amanota ane.

Ku rundi ruhande AS Kigali na yo yashakaga amanota atatu yo gukomeza gushimangira umwanya wa gatatu.

Muri uyu mukino, Rayon Sports yatangiranye imbaraga isatira izamu rya AS Kigali ishaka gufungura amazamu hakiri kare.

Ku munota wa 10, AS Kigali yakinaga buke yashoboraga gufungura amazamu ku mupira watakajwe n’Ubwugarizi bwa Rayon Sports, usanga Emmanuel Okwi mu rubuga rw’amahina, awukinisha nabi Daffe ujya muri koruneri itagize icyo itanga.

Ku munota wa 15, Rayon Sports yahushije uburyo bw’igitego ku mupira watewe na Rukundo Abdul Rahman ukurwamo n’umunyezamu Niyonkuru Pascal mbere y’uko Franklin Onyeabor awukura mu rubuga rw’amahina.

Ku munota wa 26, AS Kigali yafunguye amazamu ku gitego cyatsinzwe na Emmanuel Arnold Okwi arobye umunyezamu Khadime Ndiaye wari wasohotse ku mupira Bugingo Hakim yananiwe gufunga woherejwe mu bwugarizi bwa Rayon Sports.

Nyuma yo gutsindwa Rayon Sports yagarukanye gusatira ishaka igitego cyo kwishyura harimo umupira wahinduwe na Omborenga Fitina mu rubuga rw’amahina, ushyirwa muri koruneri na Onyeabor.

Iminota itanu ya nyuma y’igice cya mbere yihariwe na Rayon Sports nyuma yaho AS Kigali yari yasubiye inyuma kugarira.

Igice cya mbere cyarangiye AS Kigali yatsinze Rayon Sports igitego 1-0 cya Emmanuel Arnold Okwi.

Mu igice cya kabiri, Rayon Sports yatangiranye impinduka Kanamugire Roger na Aziz Bassane basimbura Souleymane Daffe na Rukundo Abdul Rahman.

Ni nako byagenze Kuri AS Kigali aho Nshimirimana Jospin yasimbuye Ndayishimiye Didier

Ku munota wa 52, Rayon Sports yashoboraga kubona igitego cyo kwishyura ku gitego cyatsinzwe na Biramahire Abeddy n’umutwe ku mupira wari uhinduwe na Omborenga Fitina, ariko umusifuzi wo ku ruhande, Maniragaba Valery, agaragaza ko hari habayeho kurarira.

Ku munota wa 59, AS Kigali yabuze amahirwe yo kubona igitego cya kabiri ku ishoti rikomeye ryatewe na Nshimiyimana Tharcisse ari mu rubuga rwa Rayon Sports rikurwamo na Khadime Ndiaye mbere yo gufata neza umupira.

Ku munota wa 64, Kanamugire Roger yishyuriye Rayon Sports n’umutwe ku mupira wari uvuye muri koruneri yatewe na Muhire Kevin.

Ku munota wa 73, Rayon Sports yatsinze igitego cya kabiri cyatsinzwe na Biramahire Abeddy, aroba umunyezamu Niyonkuru Pascal wari wasohotse.

Mbere y’uko umukino urangira umusifuzi wa kane yongeyeho iminota itanu y’inyongera.

Rayon Sports yakomeje gushaka igitego cya gatatu ba myugariro ba AS Kigali bakomeza guhagarara neza.

Umukino warangiye Rayon Sports yatsinze AS Kigali ibitego 2-1, ikomeza gushimangira umwanya wa mbere muri Shampiyona n’amanota 46 irusha APR FC ya Kabiri amanota ane.

AS Kigali yagumye ku wa Kane n’amanota 33.

Indi mikino yabaye uyu munsi yasize, Police FC yatsinze Bugesera FC igitego 1-0, Marines FC yatsindiwe mu rugo n’Amagaju FC ibitego 2-1 mu gihe Umukino wari guhuza Mukura Victory Sports na Rutsiro FC kuri Stade ya Huye, wasubitswe kubera imvura nyinshi yaguye amazi akuzura ikibuga.

Shampiyona y’u Rwanda igiye kuba ihagaze ibyumweru bibiri kubera imikino y’amakipe y’igihugu.

Biteganyijwe ko izagaruka ku wa 28 Werurwe 2025.