Patriots BBC yatsinze APR BBC mu mukino wa mbere w’iya nyuma ya kamarampaka 

Patriots BBC yatsinze APR BBC amanota 83-71 mu mukino wa mbere w’iya nyuma ya kamarampaka ya Shampiyona y’Icyiciro cya Mbere muri Basketball y’Abagabo, wabaye ku mugoroba wo ku wa Gatatu tariki 11 Nzeri 2024 muri BK Arena.

APR BBC yageze muri iki cyiciro nyuma yo gusezerera REG BBC iyitsinze imikino 3-0, Patriots na yo ni ko yabigenje imbere ya Kepler BBC.

Muri uyu mukino amakipe yatangiye agenda mu gutsinda amanota abakinnyi nka Ndayisaba Ndizeye Dieudonné na Alex Mpoyo batsinda amanota ku mpande zombi.

Agace ka mbere karangiye Patriots iyoboye umukino n’amanota 21 Kuri 15 ya APR BBC.

Mu gace ka kabiri, Patriots yakomeje kongera amanota ibifashijwemo n’abakinnyi nka William Perry na Stephaun Branch watsindaga amanota menshi. 

Ku rundi ruhande, Mpoyo na Aliou Diarra bagize amakosa atatu kare bituma bakina iminota mike.

Aka gace karangiye Patriots ikomeje kuyobora umukino n’amanota 52 Kuri 28 ya APR BBC.

Mu gace ka Gatatu, Patriots yakomerejeho ikomeza kongera amanota ibifashijwemo na Stephaun Branch na Ndizeye Dieudonné. 

Kuri ruhande, APR BBC yabanyije ikinyuranyo ibifashijwemo na Ntore Habimana na Isaiah Miller.

Aka gace karangiye Patriots iyoboye umukino n’amanota 68 Kuri 50 ya APR BBC. 

Mu gace ka nyuma, Ikipe y’Ingabo yatangiye itsinda amanota atatu ibifashijwemo na Isaaih Miller na Ntore Habimana.

Umukino warangiye Patriots BBC itsinze APR BBC amanota 83 -71 mu mukino wa mbere mu nyuma ya kamarampaka muri shampiyona ya Basketball mu Bagabo.

Muri uyu mukino Stephaun Branch wa Patriots BBC niwe watsinze amanota menshi (26) mu gihe Isaiah Miller na Aliou Diarra batsinze 19 ku ruhande rwa APR BBC.

Umukino wa kabiri uteganyijwe ku wa Gatanu tariki 13 Nzeri 2024 saa moya z’ijoro muri BK Arena.