Mutsinzi yakuye inota hanze, Djihad atsindirwa mu rugo mu mikino ibanza y’i Burayi

Zira FK yo mu cyiciro cya mbere muri Azerbaijan ikinamo myugariro Mutsinzi Ange yanganyije na Osiyek yo muri Croatia igitego 1-1 mu mukino ubanza mu ijonjora rya gatatu mu yo gushaka itike y’Amatsinda ya UEFA Conference League.

Uwo mukino wabaye ku mugoroba wo Kane tariki ya 8 Kanama 2024 ubera muri Croatia.

Osijek yari mu rugo yatangiye umukino neza ndetse ku munota wa 38 yafunguye amazamu ku gitego cyatsinzwe na Anton Matković.

Iyi kipe yakomeje kuyobora umukino ndetse itangira no kwizera intsinzi. Icyakora Zira FK yaje kubona penaliti ku munota wa nyuma w’umukino, itsindwa neza na Raphael Alemão.

Umukino warangiye NK Osijek inganyije na Zira FK igitego 1-1. Umukino wo kwishyura uteganyijwe tariki 15 Kanama 2024 muri Azerbaijan.

Ikipe izasezerera indi, izabona itike y’Imikino ya Kamarampaka aho izahura n’izava hagati ya Omonia Nicosia yo muri Chypre ndetse na Fehérvár FC yo muri Hongrie, ikipe izakomeza ikazinjira mu matsinda ya UEFA Conference League.

Muri uwo mukino Myugariro Mutsinzi yakinnye iminota yose y’umukino.

Kryvbas Kryvyi Rih yatsindiwe mu rugo mu mukino ubanza wa UEFA Europa League

Kryvbas Kryvyi Rih yo mu Cyiciro cya Mbere muri Ukraine, ikinamo kapiteni w’ikipe y’igihugu Bizimana Djihad yatsinzwe na Viktoria Plzeň yo muri Repubulika ya Tchèque ibitego 2-1 mu mikino ubanza w’ijonjora rya gatatu rya UEFA Europa League.

Iyi kipe yo muri Ukraine yatangiye umukino neza maze ku munota wa 20 umunya- Ghana Prince Kwabena Adu atsinda igitego cya mbere birangira iyi kipe isoje igice cya mbere iyoboye umukino.

Mu gice cya kabiri, Viktoria Plzeň yagarukanye imbaraga maze, ku munota wa 48, Jiří Maxim Panoš yishyuye igitego cya mbere.

Iyi kipe yaje kubona igitego cy’intsinzi ku munota wa 69 gitsinzwe na Daniel Vašulín.

Umukino warangiye Viktoria Plzeň yatsinze Kryvbas Kryvyi Rih ibitego 2-1.

Umukino wo kwishyura uteganyijwe tariki 15 Kanama 2024 muri Repubulika ya Tchèque, aho ikipe izasezerera indi izerekeza mu matsinda ya UEFA Europa League.

Muri uyu mukino Kapiteni Djihad yakinnye iminota yose y’umukino.