Liverpool yerekanye umutoza mushya

Ikipe ya Liverpool yerekanye Umuholandi Arne Slot nk’Umutoza mushya wayo usimbura Umudage Jürgen Klopp wasezereye muri iyi kipe mu mwaka ushize w’imikino wa 2023/2024, nyuma y’imyaka Icyenda ayitoza.

Ku gicamunsi cyo kuri uyu wa Gatatu tariki 19 Kamena 2024 nibwo Liverpool yerekanye ku mugaragro Arne Slot, nk’umutoza wayo ku masezerano y’imyaka itatu azageza muri 2027.

Uyu mugabo w’imyaka 45 azungirizwa n’abarimo Sipke Hulshoff wari umutoza wungirije wa Feyenoord akaba kandi yarabaye umutoza wungirije mu Ikipe y’Igihugu y’u Buholandi itozwa na Ronald Koeman

Mu ntangiriro z’uyu mwaka ni bwo, Klopp wari umutoza wa Liverpool yatangaje ko azatandukana n’iyi kipe mu mpera z’umwaka w’imikino wa 2023/24, nyuma y’imyaka isaga icyenda, ibintu byatunguye abakunzi bayo.

Mu mwaka ushize w’imikino Arne Slot yafashije Feyenoord kuba iya Kabiri muri shampiyona y’Ubuholandi n’amanota 84.

Arne Slot yatwaye igikombe cya shampiyona mu Buholandi ‘’Eredivisie’’ atoza Feyenoord mu mwaka w’imikino wa 2022/23, kiba igikombe cya Mbere shampiyona yegukanye nyuma y’imyaka itandatu.

Mu yandi makipe yanyuzemo harimo na AZ Alkmaar yo mu Buholandi yatoje hagati ya 2019 na 2021.

Arne Slot asimbuye Klopp wageze muri Liverpool mu 2015 akahakorera amateka akomeye ndetse akigarurira n’igikundiro cy’abafana b’iyi kipe.

Mu myaka icyenda yari ayimazemo, yayihesheje igikombe cya Shampiyona y’u Bwongereza nyuma y’imyaka 30, anatwarana na yo UEFA Champions League ya Gatandatu, na yo yaherukaga kwegukana mu 2005.