Ibyo kwitega ku mu mukino wa nyuma wa Playoffs hagati ya APR na Patriots

Urugamba rugeze mu mahina, Imikino ya Kamarampaka muri Shampiyona ya Basketball mu Rwanda igeze mu ya nyuma igomba gusiga hamenyekanye uwegukana Igikombe cya Shampiyona.

Kuri uyu wa Gatatu tariki 11 Nzeri 2024, APR BBC irahura na Patriots mu mukino wa mbere uteganyijwe saa moya z’ijoro muri BK Arena.

APR BBC yageze ku mukino wa nyuma, isezereye REG BBC mu buryo bworoshye, iyitsinze imikino 3-0. Ni mu gihe Patriots BBC na yo yabigenje gutyo ubwo yasezereraga Kepler BBC.

Muri iyi nkuru tugiye kugaruka kuri bimwe byo kwitega muri uyu mukino.

Ni ku nshuro ya mbere Patriots BBC igiye gukina na APR BBC ku mukino wa nyuma w’amarushanwa ya “BetPawa Playoffs”

Waba umukino wo kwihimura?

Abakunzi ba Patriots ntibaribagirwa uko APR BBC yabasezereye nabi cyane muri ½ cy’Imikino ya Kamarampaka iyitsinze imikino 3-0 mu mwaka ushize w’imikino.

Uyu mwaka barakubita agatoki ku kandi bavuga ko ari umwanya mwiza wo kwihimura cyane ko nabo ngo ikipe yabo imeze neza.

Abakinnyi nka William Perry, Stephaun Branch, Frank Kamdouh, Hagumintwari Steve na Ndizeye Dieudonné ni bamwe mu bo kwitega ku ruhande rwa Patriots BBC.

Ni mu gihe ku ruhande rwa APR BBC abarimo Issaih Miller, William Robynes, Axel Mpoyo, Shema Osborn, Ntore Habimana ni abo guhangwa ijisho cyane.

Patriots BBC yatsinze APR BBC mu mikino yombi ya shampiyona y’uyu mwaka wa 2024.

Patriots BBC yatsinze APR BBC ku manota 73-59, mu mukino ubanza wa shampiyona wabaye tariki, 20 Mata 2024. Patriots BBC yongeye gutsindira APR BBC muri BK Arena, ari naho baza kuba bakinira mu mukino wo kwishyura wa shampiyona, ku manota ku manota 77-70, wabaye tariki 16 Kanama 2024.

Muri uyu mwaka wa 2024, APR BBC yatsinze Patriots BBC muri 1/2 cya Rwanda Cup 2024, ku manota 91 kuri 70.

Henry Mwinuka, utoza Patriots BBC kuri uyu mugoroba, arakora amateka yo gutoza imikino ya nyuma y’amarushanwa ya Kamarampaka “Playoffs”, ku nshuro ye ya 8 (2016, 2017, 2018, 2019, 2020, 2021, 2022 na 2024).

Mu nshuro 7 ziheruka yatoje imikino wa nyuma ya Playoffs, yatwayemo ibikombe inshuro 5, 3 muri Patriots BBC (2016, 2018, 2019) ndetse n’inshuro 2 muri REG BBC (2021 na 2022). Yatsindiwe ku mukino wa nyuma inshuro 2 (2017 na 2020).

Muri rusange, Henry Mwinuka yatwaye ibikombe 5 muri shampiyona y’u Rwanda.

Umwka ushize igkombe cya Shampiyona cyegukanywe na APR BBC itsinze REG imikino 4-0.

Kwinjira kuri iyi mikino ni amafaranga y’u Rwanda 2 000 hejuru, ibihumbi 5 Frw hasi, Ibihumbi10 Frw muri VIP n’ibihumbi 20 Frw muri Court Side.