FC Barcelona yanyagiye Real Madrid yegukana Super Cup ya Espagne (Amafoto)

FC Barcelona yanyagiye FC Real Madrid ibitego 5-2 yegukana Super Cup ya Espagne ku nshuro ya 15 mu mateka. 

Uyu mukino wa nyuma wabaye ku Cyumweru, tariki 12 Mutarama 2025, i Riyadh muri Arabie Saoudite.

Real Madrid yatangiye umukino neza cyane kuko munota wa Gatanu Kylian Mbappe yafunguye amazamu ku mupira mwiza yacomekewe na Vinícius Junior asiga ba myugariro ba FC Barcelona acenga umunyezamu Woljciezch szcesny atsinda igitego cya mbere.

Ntibyatinze ku wa 22, Lamine Yamal yishyura iki gitego nyuma y’umupira mwiza yaherejwe na Robert Lewandowski, wanatsinze icya kabiri kuri penaliti yabonetse ku munota wa 36.

Igitego cya gatatu cya FC Barcelona cyagiyemo ku munota wa 39 gitsinzwe na Raphinha, umukino wongerwaho iminota icyenda ku gice cya mbere yanabonetsemo icya kane cyinjijwe na Alejandro Balde.

Igice cya kabiri cyabonetsemo igitego cya gatanu cyatsinzwe na Raphinha wabaye umukinnyi mwiza muri uyu mukino, ndetse n’ikarita itukura yeretswe umunyezamu wa FC Szczęsny wakoreye ikosa Mbappé.

Mu guhana iri kosa, Rodrygo yateye ‘Coup Franc’ yari hafi y’urubuga rw’amahina, ahita ayishyira mu rucundura, Real Madrid ibona igitego cya kabiri ari na cyo cya nyuma cyabonetse mu mukino.

Umukino warangiye FC Barcelona inyagiye mukeba Real Madrid ibitego 5-2 yegukana igikombe kiruta ibindi muri Espagne ‘Supercopa de España’ ku nshuro ya 15 mu mateka. 

Iki ni cyo gikombe cya mbere Umutoza Hansi Flick ahesheje FC Barcelona kuva yayigeramo muri Gicurasi 2024.

Iyi kipe ya FC Barcelona yaherukaga kwegukana iki gikombe mu 2023. Yageze ku mukino wa nyuma itsinze Athletic Club ibitego 2-0 mu gihe Real Madrid FC yatsinze Mallorca ibitego 3-0 muri 1/2.