Cricket: India yegukanye igikombe cy’Isi mu bakobwa batarengeje imyaka 19

India 69-68 England

Kuva taliki 14 kugeza 29 Mutarama 2023 muri Afurika y’Epfo habereye imikino y’igikombe cy’Isi muri Cricket mu  cyiciro cy’abakobwa batarengeje imyaka 19 “ICC U-19 Women’s T20 World Cup 2023”, iyi mikino ikaba yari  ibaye ku nshuro ya mbere.

Ikipe ya India ni yo yegukanye igikombe itsinze ku mukino wa nyuma ikipe ya England.

Muri uyu mukino wabaye taliki 29 Mutarama 2023,  ikipe ya England ni yo yatangiye ikubita agapira  ishaka amanota “Batting” maze mu dupira 103 (17.1 Overs) abakinnyi 10 basohowe mu kibuga (10 Wickets)  bamaze gukora amanota 68.

Mu gice cya kabiri, ikipe ya India yasabwaga amanota 69 ngo yegukane intsinzi yatangiye gukubita agapira “Batting” maze mu dupira 84 (14 Overs) ikora amanota 69 mu gihe abakinnyi 3 ari bo basohowe mu kibuga (3 Wickets).

Uyu mukino wa nyuma wabereye muri JB Marks Oval mu mujyi wa Potchefstroom.

Iyi kipe ya India yageze ku mukino wa nyuma isezereye muri ½ ikipe ya New Zealand naho ikipe ya England isezerera Australia. Iyi mikino yombi yabaye taliki 27 Mutarama 2023.

Grace Scrivens ukinira England  ni we wabaye umukinnyi witwaye neza mu irushanwa ryose “Player of the Tournament” aho mu mikino 7 yatsinze  amanota 293, asohora mu kibuga abakinnyi 9 (9 Wickets).

Hanatowe abakinnyi bagize ikipe y’irushanwa  “Team of the Tournament”.

Iri rushanwa ryari ryitabiriwe n’amakipe 16  aho yari agabanyije mu matsinda 4. Itsinda A  ryari ririmo  Australia, Bangladesh, Sri Lanka na USA. Itsinda B rigizwe n’u Rwanda, u Bwongereza, Pakistan na Zimbabwe. Itsinda C ririmo Indonesia, Ireland, New Zealand na West Indies naho itsinda  D rigizwe na India, Scotland, South Africa na United Arab Emirates.

Nyuma y’imikino yo mu matsinda, amakipe 3 ya mbere muri buri tsinda  yakomeje mu kindi cyiciro cy’amakipe 12  “Super 6” aho aya makipe yashyizwe mu matsinda 2,  itsinda rya mbere “Group 1”  ryari rigizwe na India, Australia, Bangladesh, South Africa, Sri Lanka na UAE naho itsinda rya kabiri “Group 2” rigizwe na England, New Zealand, u Rwanda, Ireland, Pakistan na West Indies.

Nyuma y’imikino yo mu matsinda, ikipe ya India na Australia (Group 1)  na England na New Zealand (Group 2) zakomeje muri ½  hanyuma, ikipe ya India na England zihurira ku mukino wa nyuma.

Uko amakipe yakurikiranye

Ikipe ya India yasoreje ku mwanya wa mbere ikurikirwa na England, New Zealand (3), Australia (4), Bangladesh (5), South Africa (6), Pakistan (7), Rwanda (8), Sri Lanka (9), West Indies (10), Ireland (11), UAE (12), Scotland (13), Indonesia (14), USA (15) na Zimbabwe (16).

Amakipe 12 ya mbere biteganyijwe ko azabona itike y’imikino y’igikombe cy’Isi izaba ku nshuro ya kabiri muri 2025 atabanje gukina imikino yo gushaka itike.