CAF Champions League: APR FC yongeye gutombora Pyramids yo mu Misiri

APR FC yo mu Rwanda yatomboye Pyramids yo Misiri mu ijonjora rya mbere ry’imikino ya CAF Champions League 2025/26.

Tombola y’uburyo amakipe azahura muri iri rushanwa rihuza amakipe yatwaye ibikombe imbere mu gihugu muri Afurika yabereye i Dar es Salaam muri Tanzania kuri uyu wa Gatandatu tariki 9 Kanama 2025.

APR FC, yegukanye Shampiyona y’u Rwanda ya 2024/2025, yatomboye Pyramids yabaye iya kabiri muri shampiyona yo mu Misiri.

APR FC ni yo izatangira yakira Pyramids FC mu mukino uteganyijwe hagati y’itariki 19 na 21 Nzeri, mu gihe uwo kwishyura uzakinwa hagati y’itariki 26 na 28 Nzeri 20025.

Pyramids isanzwe ifite igikombe giheruka, ni ku nshuro ya gatatu yikurikiranya amakipe yombi agiye guhura muri iyi mikino, muri izo nshuro zose Pyramids yasezereye APR FC.

Mu nzira igana mu matsinda, Ikipe izakomeza hagati ya APR FC na Pyramids, izahura n’izava hagati ya Rema Stars yo muri Nigeria na US Zilimadjou yo mu Birwa bya Comoros.

Ikipe y’Ingabo imaze iminsi yiyubaka bikomeye ihereye ku mutoza Abderrahim Talib yasimbuje Umunya- Serbia Darko Nović.

Iyi kipe ntabwo yahindutse cyane kuko yaguze abakinnyi barimo Memel Dao, William Tangui, Ronald Ssekiganda n’abandi.

Uretse imikino ya gishuti imaze iminsi ikina, Ikipe y’Ingabo iri gutegura umukino ukomeye izakiramo Power Dynamos yo muri Zambia, tariki ya 17 Kanama 2025.