APR FC yegukanye igikombe cya shampiyona ku nshuro ya 21

Taliki 27-05-2023

Mukura 4-3 Musanze FC

Gasogi United 3-0 Espoir FC

Taliki 28-05-2023

Sunrise  FC 0-1 Rayon Sports

Police FC 0-1 Marines FC

Kiyovu 3-1 Rutsiro FC

Gorilla 1-2 APR FC

Etincelles FC 1-1 Rwamagana City

Bugesera FC 2-1 AS Kigali

Taliki 27 na 28 Gicurasi 2023 ni bwo hakinwe imikino y’umunsi wa nyuma muri shampiyona y’icyiciro cya mbere mu mupira w’amaguru mu bagabo “Primus National League 2022-2023”.

Ikipe ya APR FC yitwaye neza itsinda Gorilla FC ibitego 2-1 mu gihe ikipe ya Kiyovu yatsinze Rutsiro FC ibitego 3-1. Aya makipe yombi yasoje anganya amanota 63  ariko APR FC ifata umwanya wa mbere kuko  yari izigamye ibitego 26 mu gihe Kiyovu yari izigamye 17.

Iyi kipe ya APR FC yahise yegukana igikombe cya shampiyona ya 2022-2023 kiba igikombe cya 4 yegukanye yikurikiranya (2019-2020, 2020-2021, 2021-2022 na 2022-2023), iyi kipe kandi akaba ari igikombe cya 21 cya shampiyona  yegukanye muri rusange. Iyi kipe yahawe igikombe giherekejwe na sheki ya miliyoni 25 z’amafaranga y’u Rwanda.

Mu yindi mikino y’umunsi wa nyuma yabaye, Mukura yatsinze Musanze FC ibitego 4-3, Gasogi United itsinda Espoir FC ibitego 3-0, Rayon Sports itsinda Sunrise FC igitego 1-0, Marines FC itsinda Police FC igitego 1-0, Etincelles FC inganya na Rwamagana City FC igitego 1-1 naho Bugesera FC itsinda AS Kigali ibitego 2-1.

Ikipe ya APR FC ni yo yasoje shampiyona iyoboye n’amanota 63 iganya na Kiyovu yasoreje ku mwanya kabiri. Ikipe ya Rayon Sports yasoreje ku mwanya wa 3 n’amanota 61 ikurikirwa na AS Kigali (47), Police FC (47), Mukura (45), Etincelles FC (44), Gasogi United (43), Gorilla FC (39), Musanze FC (37), Sunrise FC (34), Marines FC (34), Bugesera FC (32), Rwamagana City FC (32), Rutsiro FC (30) na Espoir FC (17).

Ikipe ya Rutsiro FC yasoreje ku mwanya wa 15 ndetse na Espoir FC yasoreje ku mwanya wa nyuma wa 16 zamanutse mu cyiciro cya kabiri aho zizasimburwa na Etoile de l’Est FC n’Amagaju FC.

Ikipe ya APR FC ni yo izahagararira u Rwanda mu mikino y’Afurika y’amakipe yabaye aya mbere iwayo “TotalEnergies CAF Champions League 2023-2024”.

Umwaka w’imikino uzasozwa taliki 03 Kamena 2023 ahateganyijwe umukino wa nyuma w’igikombe cy’Amahoro 2023 aho ikipe ya Rayon Sports izakina na APR FC, umukino uzabera kuri Sitade Mpuzamahanga ya Huye.