Amagare : Soupe Geoffrey yegukanye “La Tropicale Amissa Bongo 2023”
-
- Mutarama 31, 2023
- Hashize imyaka 3
Kuva taliki 23 kugeza 29 Mutarama 2023 muri Gabon habereye isiganwa mpuzamahanga ry’umukino wo gusiganwa ku magare ku nshuro ya 16 “La Tropicale Amissa Bongo 2023”.
Umukinnyi ukinira ikipe ya TotalEnergies mu Bufaransa ari ho na we akomoka, Soupe Geoffrey ni we wegukanye iri siganwa ryaherukaga kuba muri 2020.
Soupe Geoffrey ufite imyaka 34 y’amavuko yasoreje ku mwanya wa mbere aho mu ntera 7 zihwanye na kilometero 903,2 yakoresheje amasaha 20, iminota 18 n’amasegonda 16. Yakurikiwe na Amari Hamza ukomoka muri Algeria (20h18’45”) naho ku mwanya wa 3 haza Rougier-Lagane Christopher ukomoka muri Mauritius (20h18’50”).
Uyu mukinnyi akaba yaregukanye intera ya mbere (Bitam-Oyem) ubundi intera ya 3 (Lébamba-Mouila) aba uwa 3, intera ya 5 (Kango-Angodjé) n’iya 6 (Port Gentil-Port Gentil) aba uwa 2.
Ikipe y’u Rwanda yasoreje ku mwanya wa 5
Iri siganwa “La Tropicale Amissa Bongo 2023” ryitabiriwe n’abakinnyi 6 b’u Rwanda. Uwaje ku mwanya wa hafi muri rusange ni Manizabayo Eric wasoreje ku mwanya wa 18 akoresheje amasaha 20, iminota 20 n’amasegonda 23. Uhiriwe Byiza Renus yasoreje ku mwanya wa 26, Kagibwami Suayibu (31), Areruya Joseph (42), Byukusenge Patrick (43) na Mugisha Moise (45).
Abakinnyi 89 ni bo batangiye isiganwa ku ntera ya mbere hasoza 84.
Ikipe y’u Rwanda yasoreje ku mwanya wa 5 inyuma ya TotalEnergies (France) yasoreje ku mwanya wa mbere, Bingoal WB (Belgique) ku mwanya wa kabiri, Eritrea (3), EF Education-Nippo DT (4). Ku mwanya wa 6 hasoreje Maroc, Beykoz Team- Turkey (7), Algeria (8), Burgos BH-Spain (9), Cameroun (10), Mauritius (11), Burkina Faso (12), Côte D’ivoire (13), Gabon (14) na Benin (15).
-
- Mutarama 31, 2023
- Hashize imyaka 3
