Amagare: Remco yegukanye ITT ku nshuro ya gatatu muri Shampiyona y’Isi mu bagabo

Umubiligi Remco Evenepoel yegukanye Shampiyona y’Isi yo gusiganwa ku magare mu cyiciro cyo gusiganwa n’ibihe bagabo (ITT) akoresheje iminota 49 n’amasegonda atandatu.

Kuri iki Cyumweru, tariki ya 21 Nzeri 2025, ni bwo mu Mujyi wa Kigali hatangiye kubera isiganwa rya Shampiyona y’Isi y’Amagare mu byiciro bitandukanye rihereye mu bagore basiganwa n’ibihe.

Remco Evenepoel wahagurutse saa kumi zuzuye yagerageje gukoresha umuvuduko wo hejuru ageze Mujyi yasatiriye Pogacar usanzwe ari nomero ya mbere ku Isi wahagurutse iminota ibiri n’amasegonda 30.

Bagana kuri Rond-Point, Remco yanyuze kuri Tadej Pogacar bari kuzamuka mu muhanda w’amabuye, ku Kimihurura.

Remco w’imyaka 25 yageze kuri Kigali Convention Centre akoresheje iminota 49 n’amasegonda atandatu.

Uyu mukinnyi yanditse amateka yo kwegukana Umudali wa zahabu inshuro eshatu zikurikiranya muri iki cyiciro, nyuma yo kubikora i Glasgow mu 2023 n’i Zurich mu 2024. Uyu munsi hari i Kigali.

Yakurikiwe n’Umunya-Australia Jay Vine yabaye uwa kabiri akoresheje iminota 51, naho uwa gatatu aba Umubiligi Ilan Van Wilder wakoresheje iminota 52,22.

Nsengiyumva Shemu wahagurutse mbere y’abandi bakinnyi bose mu bagabo, yabaye uwa 25 asizwe iminota itandatu n’amasegonda 55 na Remco wabaye uwa mbere.

Ni mu gihe Mugisha Moise yabaye uwa 31 yasizwe iminota umunani n’amasegonda 54.

Tadej Pogacar wari uhanzwe amaso, niba i Kigali ari ho ashobora guhindurira ibintu muri ITT, yabaye uwa kane nyuma yo gukoresha iminota 52,23 ku ntera y’ibilometero 40,6, arushwa iminota ibiri n’amasegonda 37 na Remco Evenepoel wabaye uwa mbere.

Pogacar usanzwe ari nomero ya mbere ku Isi, azongera gukina ku Cyumweru, tariki ya 28 Nzeri 2025, mu isiganwa ryo mu muhanda rizaba rifite intera y’ibilometero 267,5.

Shampiyona y’Isi y’Amagare iri kubera i Kigali, irakomeza kuri uyu wa Mbere tariki ya 22 Nzeri 2025, abakinnyi b’abahungu n’abakobwa batarengeje imyaka 23 basiganwa n’igihe [ITT].

Abahungu batarengeje imyaka 23 bazakina intera y’ibilometero 31,2 guhera saa 13:35.

U Rwanda ruzaba ruhagarariwe na Tuyizere Etienne na Niyonkuru Samuel.

Abakobwa batarengeje imyaka 23 bazakina intera y’ibilometero 22,6.

Abanyarwandakazi bazakina iri siganwa ni Nyirarukundo Claudette na Mwamikazi Jazilla guhera saa 10:30.