Abanyeshuri 89,1% batsinze ibizamini bya Leta bisoza ayisumbuye

Minisiteri y’Uburezi (MINEDUC) yatangaje ko abanyeshuri biyandikishije gukora ibizamini bya Leta bisoza amashuri yisumbuye mu mwaka w’amashuri wa 2024/2025 bari 106.418, hakora   106.078, hakaba haratsinze 94.409 bari ku kigero cya 89,1%, aho abahungu batsinze ku kigero cya 93’5% mu gihe abakobwa batsinze kuri 85,5%.

Ni ibyagarutsweho kuri uyu wa 01 Nzeri 2025, ubwo MINEDUC yatangazaga amanota y’ibizamini bya leta bisoza amashuri yisumbuye mu mwaka w’amashuri 2024/2025.

MINEDUC yatangaje ko ikigero cy’imitsindire muri uyu mwaka cyazamutse ugereranyije n’umwaka ushize wa 2023/2024 aho bari batsinze ku kigero cya 78%.

Minisitiri w’Uburezi Nsengimana Joseph, yemeje ko umusaruro wagaragaye muri uyu mwaka ushimishije ugereranyije n’umwaka ushize, akavuga ko byatewe n’umwete abana bashyizemo n’imbaraga z’abarezi binyuze muri gahunda nzamurabushobozi.

Yagize ati: “Abanyeshuri bakoze neza ndetse umusaruro twarawishimiye.”

Imibare ya MINEDUC igaragaza amanota y’abanyeshuri yazamutse muri uyu mwaka aho abagize hagati ya 50-60 ari 16.590 mu gihe umwaka ushize bari 14.438.

Abagize hagati y’amanota 60-70 umwaka ushize bari 12.624  muri uyu mwaka bakaba ari 17.933, abagize amanota ari hagati ya  70-80 umwaka ushize  bari  8.066 bakaba barabaye  12.234 muri uyu mwaka, mu gihe abagize amanota ari 80-90  umwaka ushize bari 2.771 ubu bakaba ari  4.668  naho abagize amanota ari 90-100 umwaka ushize bari  117 ariko muri uyu mwaka bakaba ari 242.

Ku bijyanye n’uturere twahize utundi mu mitsindire Akarere ka Kayonza kayoboye utundi ku kigero cya 96,9%, gakurikiwe n’aka Kirehe kari kuri 95% mu gihe Uturere turi inyuma mu mitsindire ari Kamonyi iri kuri 85% na Nyarugenge iri kuri 87,1%.