Mukura VS yatsinze APR FC, Rayon Sports ibona izindi mbaraga (Amafoto)

Mukura VS yatsinze APR FC igitego 1-0 mu mukino wa 18 wa Shampiyona wabereye kuri Sitade Huye, kuri iki Cyumweru tariki ya 23 Gashyantare 2025.

APR FC yagiye gukina uyu mukino isabwa gutsinda kugira ngo isigazemo ikinyuranyo cy’inota rimwe hagati yayo na Rayon Sports iyoboye Rayon Sports.

Umukino watangiranye imbaraga nyinshi ku mpande zombi kuko mu minota ibiri gusa hari hamaze kuboneka koruneri ku mpande zombi nubwo zitabyajwe umusaruro.

Ku munota wa 18’ Mukura VS yafunguye amazamu ku gitego cyinjijwe na Destin Maranda.

Igice cya mbere cyarangiye Mukura VS yatsinze APR FC igitego 1-0.

Igice cya kabiri cyatangiranye impinduka zikomeye ku ruhande rwa APR FC aho Denis Omedi, Dauda Yussef, Ruboneka Jean Bosco na Lamine Bah bahaye umwanya Mugisha Girbert, Niyibizi Ramadhan, Mamadou Sy na Nshimirimana Ismael Pitchou.

Impinduka z’umutoza wa APR FC nta kinini zafashije iyi kipe kuko iminota irenga 20 yashize nta gitego cyangwa gusatira izamu rya Mukura VS.

Umukino warangiye Mukura VS itsinze APR FC igitego 1-0.

APR FC yagumye ku mwanya wa kabiri n’amanota 37 irushwa na Rayon Sports ya mbere amanota ane mu gihe Mukura VS yahise ifata umwanya wa Gatandatu n’amanota 27.

Undi mukino wabaye uyu munsi Vision FC yanyagiwe na Bugesera FC ibitego 4-0.