Umujyanama wihariye wa Perezida wa Repubulika y’u Rwanda mu by’umutekano Gen. James Kabarebe, yagaragaje uburyo urugamba rwo kubohora u Rwanda rwasabaga ibintu byinshi ndetse abanyamuryango ba RPF-Inkotanyi bakoraga ubucuruzi ntibatezutse gushyigikira urugamba mu buryo bw’amikoro.
Gen Kabarebe yabigarutseho kuri uyu wa Mbere mu kiganiro yagejeje ku bikorera bagera kuri 400 baherutse gutorerwa kuyobora Urugaga rw’Abikorera kuva ku rwego rw’Igihugu kugeza mu nzego z’ibanze, bari mu mwiherero w’iminsi itatu mu Karere ka Bugesera.
Gen Kabarebe yagize ati: “Urugamba rwo kubohora Igihugu cyacu rwasabaga ibintu byinshi ndetse abanyamuryango ba RPF bari mu bucuruzi baritanze bikomeye mu rugendo rwo kuborora u Rwanda.”
Yakomeje agaragaza ubufatanye bwaranze abanyamuryango ba RPF agira ati: “Kuva kera RPF yashyize imbere ubufatanye. No mu rugamba rwo kubohora u Rwanda ni ko byagenze. Umusirikare wa FAR twafataga ntitwamwicaga nkuko FAR yabikoraga. Ex-FAR witwa Minani twafashe muri 1992 yadufashije dutera Ruhengeri kuko na gereza ntitwari tuzi aho iri.”
Yongereyeho ko mu gihe cy’urugamba nta muntu n’umwe mu barurwanaga cyangwa abanyamuryango batangaga umusanzu watekerezaga ko u Rwanda rwazagera ku kwiyubaka n’umuvuduko w’iterambere rwagendeyeho nyuma ya Jenoside yakorewe Abatutsi.
Ati: “Ibyo byashobotse kubera ubuyobozi bufite icyerekezo bwa RPF Inkotanyi buyobowe na Nyakubahwa Perezida Paul Kagame.
Yakomeje asaba aba bayobozi bari mu mwiherero w’iminsi itatu ndetse n’abo bayobora kongera umurego mu byo bakora kuko bafatiye runini ubukungu bw’Igihugu n’imibereho myiza y’abaturage.
Gen Kabarebe yabibukije ko ubukungu bw’u Rwanda buri mu biganza byabo bityo ko bakwiye gukomeza kubyaza umusaruro amahirwe ahari yo gukorera mu gihugu cyorohereza ubucuruzi n’ishoramari ndetse kikaba gitekanye.
Ati:” Abikorera bakwiye kuba bayoboye ubukungu bw’Igihugu cyacu. Igihugu kiratekanye bityo ni uruhare rwanyu mu gukoresha ayo mahirwe ngo ubukungu bw’Igihugu cyacu butere imbere ku buryo burambye.
Aha yashimangiye ko nta muntu ufite inyungu nyinshi mu mutekano nk’uwo u Rwanda rufite kurusha umucuruzi ubasha gukora ubucuruzi bwe ku manywa na nijoro ntacyo yikanga abasaba kuwusigasira.
Perezida w’Urugaga rw’Abikorera Robert Bafakulera, na we avuga ko kimwe mu byo abikorera bishimira ari amategeko arengera abikorera ku buryo nta karengane bahura na ko bigatuma bishyira bakizana mu bucuruzi bwabo.
Yavuze ko nk’abikorera bakomeje urugamba rwo kwibohora mu by’ubukungu n’ubucuruzi bashyiraho uburyo bwo gufashanya hagati yabo mu nyungu z’iterambere ry’Igihugu cyose muri rusange.
