20°C , Partly cloudy | Kigali-Rwanda

Yora Kashi: Airtel-Tigo yashyikirije abanyamahirwe 2 miriyoni 20

Yanditswe na Ntawitonda Jean Claude

Ku ya 24-12-2018 saa 19:22:57
Iradukunda Ornella ashyikirizwa sheki ya miriyoni 10

Nyuma y’iminsi 90 itanga amahirwe mu turere dutandukanye tw’igihugu yo gutsindira amafaranga mu marushawa yiswe Yora Kashi, Sosiyete y’itumanaho Airtel-Tigo yasoje ku mugaragaro ayo marushanwa ihemba abanyamahirwe babiri batsindiye ibihembo nyamukuru bya miriyoni 20 z’amafaranga y’u Rwanda buri umwe.

Ku ikubitiro Iradukunda Ornella ukomoka mu Karere ka Kicukiro na Ngayabahunga Jean Bosco ukora akazi ko gusoroma icyayi mu Karere ka Rulindo, babaye bashyikirijwe sheki ya miriyoni 10 z’amafaranga y’u Rwanda, asigaye Airtel-Tigo ikazayabasangisha mu turere twabo.

Nyuma yo gushyikirizwa igihembo ku wa Gatanu tariki 21 Ukuboza 2018, Iradukanda Ornella n’umunezero mwinshi yagize ati: “Aya mafaranga agiye kumfasha gusubukura umushinga wo kubaka inzu nari narahagaritse kubera ubushobozi buke. Ubu ngiye kuyisubukura kandi nizeye ko nimara kuyuzuza izangirira akamaro mu buryo bufatika, maze urugo rwange rutere imbere .”

Ngayabahunga Jean Bosco na we ati “Najyaga nkina nkumva abandi ni bo batombora, ariko ubwo bampamagaraga bambwira ko ari nge munyamahirwe natunguwe n’uko natsindiye ayo mafaranga yose. Ubwo nyaboye ngiye gutangira ubucuruzi bwange kandi nshimira Airtel-Tigo itumye inzozi zange ziba impamo.”

Umuyobozi wa Airtel-Tigo Amit Chawla, avuga ko muri rusange Yora Kashi yitabiriwe ku kigero gishimishije.

Ati: “Yora Kashi yitabiriwe na benshi mu bafatabuguzi bacu barenga miriyoni eshanu mu gihugu hose kandi dushingiye ku buhamya bw’abatsinze, bemeza ko amafaranga batsindiye yabahinduriye ubuzima ku buryo bufatika.”

Yakomeje avuga ko batagarukira ku guhemba abatsindiye ibihembo ahubwo banagirwa inama ndetse bakanaherekezwa mu rugendo rwo gushyira mu bikorwa imishinga biyemeje gukora.

Yakomeje agira ati “Abakozi bacu b‘inzobere mu birebana n’icungamutungo babagira inama zirebana no gucunga neza uwo mutungo w’amafaranga atari make aba aje abatunguye batarigeze kuyatunga mu buzima; bituma batayasesagura ahubwo akabagirira akamaro bo n’imiryango yabo.’’

Muri rusange abakiriya 226 ni bo bitabiriye irushanwa rya Yora Kashi mu gihugu hose, harimo 24 batsindiye miriyoni imwe, ababarirwa mu 180 batsindiye ibihumbi 500, biyongeraho 20 batsindiye amafaranga make bayoraga mu gasanduku.

Yora Kashi ni yo marushanwa ya mbere Abanyarwanda bishimiye cyane ugereranyije n’andi yakozwe na Airtel-Tigo kuko wasangaga baataritabiriye bishimiye ko abaturanyi babo begukanye inssinzi.

Ubuyobozi bwa Airtel-Tigo bwiyemeje gutegura andi marushanwa azakomeza kunyura Abanyarwanda ku murongo w’itumanaho uhuriweho n’abasaga miriyoni eshanu.

Airtel-Tigo yiyemeje gutegura andi marushanwa ashimisha Abanyarwanda kurusha Yora Kashi

Anita Pendo ni umwe mu batangazaga abatsindiye ibihembo kuri televiziyo

Iradukunda Ornella na Ngayabahunga Jean Bosco bakikije Umuyobozi wa Airtel-Tigo, Amit Chawla

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.