Kigali-Rwanda

Partly sunny
25°C
 

Yaya Toure yemeje ko agiye kugaruka mu ikipe y’igihugu

Yanditswe na admin

Ku ya Dec 28, 2017

Gnégnéri Yaya Touré usanzwe ukina hagati mu ikipe ya Manchester City yo muri shampiyona y’u Bwongereza yemeje ko agiye kugaruka gukinira ikipe y’igihugu ya Côte d’Ivoire “Les Elephants” nyuma y’uko yari yasezeye mu 2016.

Binyuze k’umuhagarariye, Dimitry Seluk yaje gutangaza ko umukiliya we yemeye kongera gukinira ikipe y’igihugu ndetse ko yifuza gutwarana nayo ibindi bikombe.

 Yagize ati “Yaya Toure yiyemeje kugaruka mu ikipe y’igihugu ya Côte d’Ivoire. Arashaka gutwara ikindi gikombe muri les Elephants”.

Yaya Touré ubwe abinyujije ku rubuga nkoranyambaga rwa “Twitter” yavuze ko akunda igihugu ke ko yiteguye kuba yakongera guhamagarwa mu ikipe y’igihugu ndetse akaba anifuza gufasha abakurikiraho ko bakigira ku bunararibonye bwe bityo bakazishimirwa n’abaturage b’icyo gihugu.

Touré w’imyaka 34 y’amavuko yari yatangaje ko ahagaritse gukinira ikipe y’igihugu ya Côte d’Ivoire muri Nzeri 2016.  Amaze gukinira iyo kipe y’igihugu imikino irenga 100 akaba yarayifashije kwegukana igikombe cy’Afurika “CAN 2015”.

Iyi kipe y’igihugu ya Côte d’Ivoire iherutse kunanirwa kubona itike yo kuzakina imikino ya nyuma y’igikombe k’isi cyo mu 2018 kizabera mu Burusiya, gusa ikaba yitegura gukina imikino y’amajonjora yo gushaka itike y’igikombe cy’Afurika cyo mu 2019 “CAN 2019”.

Cote d’Ivoire ikaba iri kumwe mu itsinda H n’u Rwanda, Guinea na Central African Republic. Nyuma yo gutsindwa na Guinea ibitego 3-1 mu mukino ufungura itsinda muri Kamena 2017, Cote d’Ivoire izakina umukino wa kabiri n’u Rwanda  muri Nzeri 2018 i Kigali.

Gnégnéri Yaya Touré wageze muri Manchester City avuye muri Barcelona yo muri Espagne mu 2010, nta bwo ari kubona umwanya uhagije wo gukina kuko amaze kugaragara mu kibuga mu mikino 3 yonyine muri uyu mwaka w’imikino wa 2017-2018.

NKOMEJE GUILLAUME