26°C , Mostly cloudy | Kigali-Rwanda

Witakenge  wakiniye Rayon Sports, APR FC n’ikipe y’igihugu yapfuye azize uburwayi

Yanditswe na BUGINGO FIDELE

Ku ya 25-04-2020 saa 21:03:18
Nyakwigendera Witakenge Jeannot

Witakenge Jeannot  wakiniye ikipe ya Rayon Sports, APR FC n’ikipe y’igihugu y’u Rwanda akaba  yakomokaga muri RDC,  mu ijoro ryo ku wa Gatanu tariki 24 Mata 2020  yapfuye azize uburwayo yari amaranye iminsi akaba yari arwariye mu bitaro by’i Bukavu (Hôpital Provincial Général de Référence de Bukavu).

Aya makuru yemejwe na mukuru we, Wakenge Kigogo Jolie mu itangazo yashyize ahagaragara amenyesha inshuti z’umuryango ndetse n’aho Witakenga Jeannot   yaciye nk’umukinnyi mu mu makipe atandukanye.

Tariki 27 Mata 2020 ni bwo Witakenge Jeannot    azashyingurwa mu irimbi ry’ahitwa Ruzizi i Bukavu.

Nyakwigendera Witakenge Jeannot wari ufite imyaka 39 y’amavuko  yatangiye kugira uburwayi muri Nyakanga 2019 aho  basanze afite ikibazo cya kanseri mu gifu aho yabazwe agasa n’uworohewe akava mu bitaro. Tariki 11 Mata 2020, Witakenge Jeannot yasubiye mu bitaro  nyuma y’iminsi 6 byavuzwe ko yapfuye ariko umuryango we ukabinyomoza gusa bemeza ko arembye cyane.

Witakenge  wari umukinnyi mwiza wo hagati mu kibuga, yakiniye ikipe ya St Eloi Lupopo, Muungano (RDC), Rayon Sports na APR FC (Rwanda) na  AS Inter Stars (Burundi). Nyuma yabaye umutoza wungirije mu ikipe ya Rayon Sports muri 2017 kugeza 2018  ubu akaba yakinaga mu ikipe y’abakanyujijeho ya VC les Épaves i Bukavu.

Umwanditsi:

BUGINGO FIDELE

One Comment on “Witakenge  wakiniye Rayon Sports, APR FC n’ikipe y’igihugu yapfuye azize uburwayi”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.