19°C , Mostly cloudy | Kigali-Rwanda

Wheelchairs Tennis: Ndayishimiye arishimira ko gukina byamurinze kwigunga

Yanditswe na BUGINGO FIDELE

Ku ya 08-12-2019 saa 12:22:46
Ndayishimiye Ernest ubwo yitabiraga Rwanda Open 2019 akanayegukana

Ndayishimiye Ernest yakoze impanuka muri 2010 acibwa akaguru k’ibumoso, muri 2013 yinjiye mu mikino y’abafite ubumuga aho yakinnye imikino itandukanye. Kuri ubu ni umukinnyi ukomeye mu mukino wa Tennis y’abafite ubumuga bakina bicaye mu tugare “Wheelchairs Tennis”.

Muri uyu mwaka wa 2019 yitwaye neza yegukana irushanwa ryo kwibuka ndetse n’irushanwa mpuzamahanga “Rwanda Open 2019” ritegurwa n’ishyirahamwe ry’umukino wa Tennis mu Rwanda “RTF”.

Nyuma yo kwegukana iri rushanwa ryabaye  tariki 24 Ugushyingo kugeza 01 Ukuboza 2019, Ndayishimiye Ernest  yagiranye ikiganiro kihariye  n’Imvaho Nshya agira byinshi atangaza ku buzima bwe n’uko yatangiye gukina bikamurinda kwigunga nyuma yo gukora impanuka.

NDAYISHIMIYE NI MUNTU KI?

Ndayishimiye Ernest yavukiye mu Karere ka Muhanga mu 1986. Muri 2010 ni bwo yakoreye  impanuka  i Nyamagabe  aho yari atwaye imodoka bituma acibwa akaguru k’ibumoso  akaba yararwaye hafi imyaka 3.

UKO YINJIYE MU MIKINO 

Muri Nyakanga 2013, Ndayishimiye  avuga ko yahuye n’abandi bakamubwira ko   hari imikino y’abafite ubumuga  bajya bakina  akumva na we abishaka kugira ngo bimurinde kwigunga.

Yagize ati : “Numvise mbyishimiye kuko nari nkeneye gukora siporo ngo  inkure mu bwigunge.” Ndayishimiye avuga ko mbere yo gukora impanuka yakinaga imikino ngororamubiri ndetse n’umupira w’amaguru.

Ndayishimiye akomeza avuga ko agitangira imikino y’abafite ubumuga yagiye muri  Sitball na Sitting Volleyball ariko kubera kwicara  biramunanira. Anavuga ko  umupira w’amaguru w’abafite ubumuga  nawo atawiyumvisemo aribwo yahise ajya mu byo gutera ingasire “Lancer  Disque”, gutera icumu “Lancer Javelot” ndetse no gutera ibiremereye “Lancer Poids”.

Avuga ko iyi mikino yayitangiye muri Nzeri 2013, nyuma y’imyaka 2 ni ukuvuga muri Nzeri 2019, Ndayishimiye yitabiriye imikino y’Afurika “All African Games 2015” muri Congo Brazzaville. Ndayishimiye avuga ko ari bwo aheruka mu mikino mpuzamahanga  ubu abikina gusa imbere mu gihugu.

YATANGIYE GUKINA TENNIS ABA ARI YO YISHIMIRA CYANE

Muri  2017 ni bwo Ndayishimiye Ernest yatangiye gukina umukino wa Tennis  y’abafite ubumuga bakina bicaye mu tugare “Wheelchairs Tennis”. Ati : Nageze muri uyu mukino numva ndawishimiye cyane mbese warandyoheye.”

Ndayishimiye muri Kamena 2017 yahise anitwara neza yegukana irushanwa ryo kwibuka “Genocide Memorial Tournament 2017”.  Mu irushanwa mpuzamahanga rya “Rwanda Open 2017”  nta bwo yitwaye neza kuko irushanwa ryegukanwe na Novatus Emmanuel Temba (Tanzania)  atsinze  Collins Omondi (Kenya).

Umwaka ushize  muri Gashyantare 2018, Ndayishimiye yitabiriye irushanwa mpuzamahanga ritanga amanota  muri Kenya  ndetse ubu ari ku mwanya wa 619 ku Isi.

Uyu mwaka wa 2019, Ndayishimiye yegukanye irushanwa ryo kwibuka  “Genocide Memorial Tournament 2019”  nyuma yegukana “Rwanda Open 2019”.

Uretse gukina, Ndayishimiye avuga ko  akora akazi ko gusifura mu mukino wa Tennis mu byiciro byose mu bafite ubumuga n’abatabufite.

ARASABA KO  BAFASHWA  KWITABIRA AMARUSHANWA MENSHI

Ndayishimiye avuga ko siporo mu kiciro cy’abafite ubumuga igeze ku rwego rwiza ariko bakigira imbogamizi zo kutabona amarushanwa menshi kugira ngo bazamure urwego rwabo rw’imikinire.

Akomeza avuga ko imyitozo nta kibazo baba bayifite kuko n’ubundi  hari abatoza ba Tennis isanzwe kandi ntaho biba bitandukaniye. Aha yavuze ko ari nayo mpamvu  gutwara igikombe bimugora kuko abo bakina basa n’abari ku rwego rumwe kuko batangiriye rimwe ahubwo bagorwa iyo bahuye n’abakinnyi batangiye mbere yabo babarusha ubunararibonye.

Yagize ati : “Iyo tugiye gukina n’abatangiye mbere yacu  nk’abanyakenya bafite nimero ya 120 ku Isi, cyangwa Afurika y’Epfo bafite nimero ya 30  ku Isi  biratugora cyane.”

Ndayishimiye avuga ko akurikije uko abona aba bakinnyi dore ko bamwe yanakinnye na bo avuga ko afite  imyitozo ndetse yaritabiriye amarushanwa menshi  yahangana nabo.

GUKINA BYAMURINZE GUSABIRIZA

Benshi mu bagize ubumuga  bwo kubura ingingo zimwe na zimwe z’umubiri bahitamo kujya ku muhanda gusabiriza. Ndayishimiye  yagize ati : Iyo ugize ikibazo nk’iki wakoreraga amafaranga  ukabona ntuzongera  bishora gutuma uhungabana ariko siporo yaramfashije ndiyakira  mbese uretse kubona ko nta kaguru mfite nta bwo wamenya ko nanakoze impanuka.”

Akomeza avuga ko gukora siporo byamurinze kuba yajya ku muhanda gusabiriza kuko n’ubwo hatabonekamo amafaranga menshi ariko hari igihe yitabira irushanwa akabona amafaranga. Aha anakangurira abandi bafite ubumuga kwitabira siporo bashoboye kuko uwayitangiye hari aho yavuye n’aho ageze.

Ati: “ Abafite ubumuga nabashishikariza gukora siporo kuko abaje  ubu bafite aho bavuye  n’aho bageze, ntihabamo amafaranga menshi ariko hari igihe ukina irushanwa ukabona amafaranga  bikaruta kwirirwa usabiriza ku muhanda.”

NDAYISHIMIYE AFITE INTEGO YO KUBA MU BAKINNYI 300 KU ISI

Kuri ubu Ndayishimiye Ernest ari ku mwanya wa 619 ku Isi,  avuga ko  ubundi Tennis  ari umukino w’umuntu ku giti ke ko ufite ubushobozi yitabira amarushanwa yose ashaka. Akomeza avuga ko mu mwaka utaha wa 2019 yifuza kwitabira  amarushanwa abiri akomeye atanga amanota ku buryo yava ku mwanya wa 619 akaba yaza mu bakinnyi 300 ba mbere ku Isi.

Ndayishimiye nyuma yo kwegukana Rwanda Open 2019

Aha yari kumwe n’abandi bitwaye neza mu byiciro bitandukanye

Ndayishimiye ubwo yitabiraga irushanwa muri Kenya

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.