WDA yagowe no gusobanura imicungire mibi y’umutungo wa Leta

Yanditswe na KAYITARE JEAN PAUL

Ku ya 15-09-2020 saa 15:59:40
WDA yananiwe gutanga ibisobanuro ku mikoreshereze y'umutungo wa Leta

Ubuyobozi bw’Ikigo k’Igihugu gishinzwe guteza imbere ubumenyingiro n’imyigishirize y’imyuga mu Rwanda (WDA), bwananiwe gusobanura imikoreshereze mibi y’imari n’umutungo wa Leta yagaragaye muri iki kigo.

WDA yitabye Komisiyo y’Abadepite ishinzwe gukurikirana imikoreshereze y’imari n’umutungo by’Igihugu (PAC) ku gicamunsi cyo kuri uyu wa Kabiri tariki 15 Nzeri 2020.

Ku ikubitiro Depite Uwimanimpaye Jeanne d’Arc avuga ko WDA kubahiriza inama z’umugenzuzi mukuru bigenda bisubira inyuma guhera 2016 kugeza umwaka ushize 2019.

WDA yananiwe gusobanura impamvu yishyuye miriyoni 16 z’ubukererwe ku modoka yamaze iminsi 22 yikoreye ibikoresho byo kubaka.

Hari kandi ikibazo cy’amasoko atanu yari afite agaciro ka 2,581,000,000 ataratangiwe raporo mu myaka ibiri.

Amafaranga angana n’ibihumbi 650 azishyurwa kubera gutsindwa urubanza WDA yarezwemo, nta bisobanuro byatanzwe ariko WDA isubiza ko izatanga raporo y’uzishyura amafaranga ya Leta yatanzwe nta mpamvu.

Umuyobozi Mukuru w’Ikigo k’Igihugu gishinzwe guteza imbere ubumenyingiro n’imyigishirize y’imyuga mu Rwanda (WDA) Eng. Gatabazi Pascal, avuga ko atishimiye gukora amakosa.

Ati: “Ntabwo tubyishimira, ntawishimira gukora amakosa. Impamvu twasubiye inyuma hari imishinga yadindiye Umugenzuzi Mukuru w’Imari ya Leta akagaruka agasanga icyo kibazo kigihari”.

WDA igaragaza ko yifashishije izindi nzego ko imaze kugaruza amafaranga agera kuri miriyoni 5.

Ku bibazo bijyanye n’amasoko, WDA yabiburiye ibisubizo. Kutishyurira imisoro ku gihe byatumye WDA yishyura miriyoni zirenga umunani kubera uburangare hakiyongeraho kuba itishyura ba rwiyemezamirimo.

Umuyobozi Mukuru wa WDA, Eng Gatabazi yagize ati: “Nta mpamvu n’imwe yatuma fagitire itishyurwa vuba”.

Amategeko avuga ko fagitire itagomba kurenza iminsi 45 ariko ngo hari ubwo biterwa n’uburyo amafaranga yinijira (cash flow).

Umugenzuzi Mukuru w’Imari ya Leta avuga ko kwishyura ba rwiyemezamirimo bagombye kwishyurwa neza akongeraho ko kutishyura, bidaterwa n’akazi kenshi ahubwo ko ari uburangare ari nabyo byabaye kuri WDA yagize.

Kwishyura sosiyete y’ubwikorezi miriyoni 16 bitewe n’uburangare, WDA isobanura ko byatewe no gutegereza uburenganzira bwa MAGERWA.

Umuyobozi Mukuru wa WDA Eng Gatabazi, yagize ati: “Iyo inzego ziza gukorana neza ntabwo tuba twarishyuye aya mafaranga bitewe n’uburangare”.

Perezida wa PAC, Muhakwa Valence, yasabye WDA ko izayimenyesha uko ayo mafaranga miriyoni 16 yishyuwe n’uwayishyuye.

WDA yemera ko aya mafaranga azaba yagarutse mu by’umweru bibiri bitarenze ku itariki 30 Nzeri 2020.

Umugenzuzi Mukuru w’Imari ya Leta, Obadiah Biraro, yagaragaje ko WDA irimo igenda yivugurura.

Hagaragajwe miriyoni zirenga 600 zaguze ibikoresho bizubakishwa, ariko nta nyubako zihari n’ubu ntibirakoreshwa.

Umuyobozi Mukuru wa WDA na we yemera ko ibyo bikoresho bitarakoreshwa. Ati “Ikibazo k’ibikoresho, habayeho ko inyubako yagomba kubakwa mu gihe gito, n’ubu ibikoresho biracyaryamye. Twatengushywe na rwiyemezamirimo n’ubu inzu ntiruzura.”

Iyi nyubako yagombaga kuba yararangiye kubakwa muri Werurwe 2020.

WDA yagaragaje ko hari ibikoresho byibwe 2018 birimo na mudasobwa 7, kandi ko hamaze kugaruzwa ebyiri.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.