25°C , Partly sunny | Kigali-Rwanda

WASAC yafashe ingamba zo kurandura inzitizi zigabanura ibipimo by’amazi

Yanditswe na SEZIBERA ANSELME

Ku ya 29-01-2018 saa 07:50:29
Uruganda rutunganya amazi rwa Nzove III ruzakemura ikibazo cy'amazi meza muri Kigali (Foto Jamez R.)

Ikigo cy’Igihugu gishinzwe isuku n’isukura (WASAC) cyafashe ingamba zihamye zo kurandura imbogamizi zose zituma amazi atagera ku baturage mu buryo bushoboka, ikora umushinga wo kongera imiyoboro y’amazi mu burebure no mu bunini, kongera igice kidasanzwe ku ruganda rwa Nzove mu buryo bwo kuyungurura amazi, gukoresha imiti iyungurura amazi n’ibindi.

Uruganda rutunganya amazi rwa Nzove III ruzakemura ikibazo cy’amazi meza (Foto Jamez R.)

Umukozi ushinzwe igenamigambi mu kigo cy’Igihugu gishinzwe isuku n’isukura (WASAC) Murekezi Dominic, abanza gusobanura zimwe mu mpamvu zituma amazi agabanuka, avuga ko mu buryo busanzwe amazi ayungururwa avanywe mu mugezi wa Nyabarongo, mu gihe imvura iguye amazi amanuka ku misozi yiroha muri Nyabarongo akamanukana ibyondo bitewe n’isuri ari nabyo bituma bigorana kuyungururika bigatera WASAC kuba ihagaritse ibikorwa byayo ngo abanze acayuke.

Akomeza atangaza ko uruganda rushya rwa Nzove ya 3 hongeweho ikindi gice kitajyaga gikoreshwa mu nganda zo mu Rwanda nyuma yo kubona ko amazi y’imigezi agenda yandura uko ibihe bigenda bitambuka kubera ko imisozi irushaho gukoreshwa. Icyo gice ngo kizafasha kubanza kurekera amazi mu migezi agacayuka imashini zibone kuyohereza mu ruganda birinde umwanya watakaraga WASAC ihagaritse serivisi.

Mu ngamba zafashwe na WASAC nk’uko Murekezi abigaragaza, hari n’ubundi buryo bwo gukoresha umuti ushobora gukorana n’ibyondo hifashishijwe abayikora kugira ngo uruganda ruyungurure amazi.

Agira ati: “Uwo muti ufasha mu kuyungurura amazi akaba meza ku buryo yakoreshwa kabone nubwo yaba yanduye cyane, ubwo buryo bwafashije cyane mu nganda nshyashya zirimo gukorwa ku buryo bujyanye n’ayo mazi yanduye cyane ariko ntibihagarike ibikorwa”.

Ku bijyanye no gusaranganya amazi, Murekezi avuga ko abaturage bose batagerwagaho n’amazi kuko hari bamwe ageraho mu buryo bworoheje, hakaba abandi batagerwaho n’imiyoboro y’amazi bityo ntibagerweho na make.

Hakozwe undi mushinga munini wo gukora imiyoboro y’amazi mu ngano no mu burebure kugira ngo azagere ku bantu benshi atabashaga kugeraho ukaba warateguwe ku bufatanye bwa  Leta y’u Rwanda na Banki nyafurika itsura amajyambere.

Uwo mushinga uzabasha guha amazi abatuye ibice bya Bweramvura, Gasanze, Rusororo, Bumbogo, Mageragere, Kanyinya n’ahandi hose hatageraga imiyoboro kandi amasoko yabyo yatangiye gutangwa.

Agira ati: “Uwo mushinga wagenewe miliyoni 262 z’amadolari ukubiyemo imishinga myinshi harimo iyo gutanga amazi mu bice bya Kigali atagezemo, ukazareba ku isukura ndetse no ku mijyi 6 yunganira Kigali. Avuga ko muri Kigali hazakorwa imiyoboro ifite ibilometero 512 byiyongeraga ku byari bisanzwe. Atangaza ko ari gahunda izamara imyaka 3 yose kugera mu 2020 igamije kwegereza abantu amazi meza”.

Murekezi avuga ko mu mbogamizi WASAC ihura nazo habamo no kugira imiyoboro mitoya ariko kandi bikaba bijyana n’imiturire uburyo amakaritsiye akase n’uko atuwe kuko hamwe akase neza ari naho habasha kujyamo imiyoboro mugari kandi utanga amazi ahagije. Ku rundi ruhande anagaragaza ko hari ahandi hatuwe mu buryo bw’ubucucike kugira ngo uwo muyoboro ujyemo bisaba ko ushyirwa kure noneho abantu bagasigara basaranganya amazi hifashishije utuyoboro duto.

Avuga ko mu mushinga mushya hazubakwamo ibigega 33 ndetse n’inzu nshya (Pump station) 5 zo gusunika amazi ahantu hari ubutumburuke.

Gusa mu kurushaho kwegereza abantu amazi WASAC n’Umujyi wa Kigali bigirana imikorere kugira ngo amazi agere ku baturage cyane cyane himurwa abantu ahari amanegeka, kuvugurura amakaritsiye bityo bikorohera WASAC kubona inzira nziza kandi ikwiye yo gucishamo ibikorwa by’amazi kuko uko umujyi utera imbere ni nako WASAC yoroherwa.

 

 

 

 

 

 

Umwanditsi:

SEZIBERA ANSELME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.