Volleyball:  UTB yatsinze RRA mu mukino wa nyuma ubanza wa “Playoffs 2019”

Yanditswe na NKOMEJE GUILLAUME

Ku ya Jun 14, 2019

Imikino yabaye

UTB VC 3-1 RRA VC

APR VC 3-1 KVC

Ikipe ya Kaminuza ya UTB VC yitwaye neza itsinda RRA VC mu mukino wa nyuma ubanza w’irushanwa rihuza amakipe yabaye 4 ya mbere muri shampiyona y’igihugu ya Volleyball “Playoffs”, mu kiciro cy’abagore amaseti 3-1.

Uyu mukino wabereye muri Salle y’Imikino ya Komite y’igihugu y’abafite ubumuga “NPC-Rwanda”, tariki 12 Kamena 2019.

Muri uyu mukino wari ukomeye, UTB VC irimo gukina shampiyona yabo ya mbere yatsinze iseti ya mbere  ku manota 25-17, iya kabiri 25-17, itsindwa iya 3 25- 18, isoza itsinda iya nyuma (4) ku manota 25-17.

Nyuma y’uyu mukino ubanza wa nyuma, biteganyijwe ko UTB VC izahura na RRA VC mu mukino wa nyuma wa kabiri uzabera kuri Sitade Nto i Remera, kuri iki Cyumweru tariki 16 Kamena 2019 (18h00).

Mu gihe iyi kipe ya UTB VC yatsinda uyu mukino wa nyuma wa kabiri wa Playoffs, yahita itwara igikombe cya shampiyona y’abagore y’uyu mwaka wa 2018-2019.

Ku rundi ruhande, RRA VC iramutse ibashije gutsinda uyu mukino wa nyuma wa kabiri, byaba ngombwa ko hazakinwa umukino wa nyuma wa 3, wazabera kuri Sitade Nto i Remera tariki 19 Kamena 2019.

Mu wundi mukino wabaye wo guhatanira umwanya wa 3, APR VC yatsinze KVC amaseti 3-1(19-25, 25-18, 25-17 na 25-19). Ikipe ya APR VC na KVC zizahura mu mukino wa kabiri, uzabera kuri Sitade Nto i Remera, tariki 16 Kamena 2019 (16h00).

Mu mwaka ushize wa 2018, RRA VC imaze kuba ubukombe muri shampiyona y’abagore ni yo yegukanye igikombe itsinze APR VC imikino 2-0. Yatsinze APR VC mu mukino wa nyuma ubanza amaseti 3-1 naho uwo kwishyura wabaye tariki 16 Kamena 2018, yongera gutsinda APR VC amaseti 3-2.

Mu mukino ubanza wa nyuma ikipe ya UTB VC yatsinzemo RRA VC amaseti 3 kuri 1