Kigali-Rwanda

Partly sunny
18°C
 

Volleyball: UTB VC yegukanye irushanwa ribanziriza shampiyona ya 2019

Yanditswe na Nkomeje Guillaume

Ku ya 15-01-2019 saa 09:48:09
Kapiteni wa UTB VC ashyikirizwa igikombe k'irushanwa ribanziriza shampiyona ya 2019

Ikipe ya UTB VC yegukanye igikombe k’irushanwa ribanziriza shampiyona y’uyu mwaka w’imikino wa 2018-2019 mu bagore “UTB Volleyball Women Pre-Season Tournament 2018-2019” itsinze RRA VC bigoranye amaseti 3 kuri 2.

Iri rushanwa ryateguwe ku nkunga ya UTB ryatangiye kuva tariki 12-13 Mutarama 2019, ryari ryitabiriwe n’amakipe 5 ari yo RRA VC, UTB VC, IPRC-Kigali VC, KVC na St Aloys VC. Ni mu gihe APR VC yo itigeze ibasha kwitabira nubwo yari yaremeje ko izagaragara muri iri rushanwa.

UTB VC yari yatsinzwe na RRA VC amaseti 3-0 (14-25, 22-25 na 22-25) mu mikino y’amajonjora yatangiye yitwara neza itsinda iseti ya mbere ku manota 25-16 itsindwa amanota 25 kuri 22.

Iyi kipe yasinyishije abakinnyi basanzwe bamenyerewe barimo Nzayisenga Charlotte wahoze muri RRA VC, yaje gutsinda iseti ya 3 kuri 25-17, itsindwa iya 4 kuri 25 kuri 18 ndetse itsinda iseti ya kamarampaka ku manota 15-10.

Ikipe ya IPRC-Kigali VC yegukanye umwanya wa 3 w’iri rushanwa itsinze KVC amaseti 3 kuri 2.

Mu bihembo byatanzwe, UTB VC yashyikirijwe igikombe n’amafaranga y’u Rwanda angana n’ibihumbi 200, RRA VC ya kabiri ihabwa ibihumbi 150 naho IPRC-Kigali VC ya 3 ihabwa ibihumbi 100.

Ku ruhande rw’abakinnyi, Nzamukosha Olive ukinira St Aloys VC yahawe igihembo cy’uwateye imipira neza ku ikipe bahanganye “Best Server”, Umulisa Pacifique ukinira KVC aba uwakiriye imipira yashyizwe mu kibuga ke «Best Receiver”, Prisca ukinira IPRC-Kigali aba uwatanze imipira «Best Setter.»

Mukantambara Seraphine ukinira RRA VC aba uwatsinze neza «Best attacker» naho Shalom ukinira UTB VC aba uwagaruye imipira «Best blocker», uwugariye neza «Best Libero» aba Uwamariya Jacqueline ukinira UTB VC naho umukinnyi w’irushanwa aba Mukandayisenga Benitha ukinira UTB VC.

Shampiyona y’abagore y’uyu mwaka w’imikino wa 2018-2019, izitabirwa n’amakipe 9 arimo RRA VC ifite igikombe giheruka, APR VC, Ruhango VC, St Aloys VC, UTB VC, KVC, IPRC-Kigali VC, IPRC-Huye VC na St Joseph VC.

Kapiteni wa UTB VC ashyikirizwa igikombe k’irushanwa ribanziriza shampiyona ya 2019

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.