Kigali-Rwanda

Partly sunny
18°C
 

Volleyball:  UTB VC yegukanye irushanwa ribanziriza shampiyona ryabereye i Gisagara

Yanditswe na BUGINGO FIDELE

Ku ya 05-11-2019 saa 09:06:23
UTB VC nyuma yo gushyikirizwa igikombe k'irushanwa ribanziriza shampiyona

Ikipe ya UTB VC yitwaye neza yegukana igikombe  k’irushanwa ribanziriza shampiyona  ryateguwe n’ikipe ya Gisagara VC “Gisagara Preseason Tournament 2019” itsinze ku mukino wa nyuma ikipe ya REG VC.

Iri rushanwa ryabereye i Gisagara  tariki 02 na 03 Ugushyingo 2019 ryari ryitabiriwe n’amakipe 6 mu kiciro cy’abagabo  aho yagabanyijwe mu matsinda 2. Itsinda A ryarimo UTB VC, Gisagara VC na IPRC Ngoma naho itsinda B ririmo REG VC, Kirehe VC  na APR VC.

Nyuma y’imikino yo mu matsinda, amakipe abiri ya  mbere yakomeje muri ½ aho  UTB VC yatsinze Kirehe VC  amaseti 3-1 ( 25-11, 22-25, 25-19 na 25-19). Ku rundi ruhande ikipe ya REG VC nayo yatsinze Gisagara VC amaseti 3-1 (25-21,25-17, 16-25 na 25-13).

Ku mukino wa nyuma, ikipe ya UTB VC yitwaye neza itsinda REG VC amaseti 3-2 (26-24, 29-31, 25-20, 20-25 na 15-09).

Mu guhatanira umwanya wa 3, Gisagara VC yateguye irushanwa yatsinze Kirehe VC amaseti 3-1 (25-21,26-24,20-25 na 25-12). Ikipe ya IPRC Ngoma ni yo yasoje ku mwanya wa 5 itsinze APR VC amaseti 3-1 (16-25, 25-16,25-19 na 25-19).

Umutoza wa UTB VC,  Nyirimana Fidele yavuze ko  bishimiye iki gikombe kandi bashimira Gisagara VC yateguye iri rushanwa kuko  byabafashije  kureba uko bahaze no kureba uko andi makipe akina.

Ku ruhande rw’umutoza wa REG VC, Mugisha Benon yavuze ko bakinnye neza n’ubwo batsinzwe ariko ahanini bafite abakinnyi bashya batari bahuza umukino ariko ko ari abakinnyi beza.

Gisagara VC yateguye irushanwa yasoreje ku mwanya wa 3, Perezida w’iyi kipe, Ntivuguruzwa Augustin  yavuze ko  bashakaga kureba uko bahagaze kandi  babonye aho bagomba kongera ingufu mu gihe shampiyona igiye gutangira.

Biteganyijwe ko imikino y’umunsi wa mbere wa shampiyona ya 2019-2020 izaba tariki 09 na 10 Ugushyingo 2019.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.