Kigali-Rwanda

Partly cloudy
18°C
 

Volleyball: UTB VC yatsinze imikino ibiri ifata umwanya wa mbere

Yanditswe na NKOMEJE GUILLAUME

Ku ya 06-03-2018 saa 08:29:56
UTB VC ni yo iyoboye urutonde rwa shampiyona by'agateganyo

Ikipe ya Kaminuza y’Ubukerarugendo, Ikoranabuhanga n’Ubucuruzi “UTB VC”, yafashe umwanya wa mbere muri shampiyona ya Volleyball by’agateganyo, nyuma yo kwitwara neza igatsinda imikino ibiri aho yari igeze ku munsi wayo wa 4.

UTB VC ni yo iyoboye urutonde rwa shampiyona by’agateganyo

Muri iyi mikino yombi yabaye ku wa Gatandatu tariki 03 Werurwe 2018, kuri Sitade Amahoro i Remera, UTB VC yatsinze  IPRC East VC mu mukino wabanje amaseti 3-1 yongera gutsinda  KVC amaseti 3-1.

Kuri uwo munsi kandi, IPRC East VC yatanze  KVC amaseti 3-0, REG VC itsinda UNIK VC biyoroheye  ku maseti 3-0, UNIK VC  itsinda IPRC South VC amaseti 3-0 ndetse iyi IPRC South VC yongera gutsindwa  na REG VC amaseti 3-0.

Mu yindi mikino yabereye mu karere ka Kirehe, APR VC yatsinze Kirehe VC amaseti 3-0 naho Gisagara VC yatsinze APR VC amaseti 3-2. Ku rundi ruhande umukino wagombaga guhuza ikipe ya Gisagara VC na Kirehe VC nta bwo waje kurangira kubera imvura bityo ukaza uzasubirwamo.

Ibi byaje gutuma Gisagara VC  itakaza umwanya wa mbere, kuko kugeza ubu, UTB VC iri ku mwanya wa mbere n’amanota 20 mu mikino 8 imaze gukina ikurikirwa na Gisagara   VC n’amanota 19 n’umukino umwe izigamye (7).

REG VC iri ku mwanya wa 3 n’amanota 18, APR  VC (15), IPRC East VC (12) hakaza Kirehe VC na UNIK VC zinganya  amanota (9), IPRC-South VC (3) naho KVC ya nyuma nta nota ifite.

Mu kiciro cy’abagore, shampiyona yari igeze ku munsi wayo wa 3 habaye imikino ibiri gusa aho APR VC yatsinze Ruhango VC amaseti 3-0 yongera no gutsinda St Joseph VC amaseti 3-0.

Mu mikino yagombaga guhuza, IPRC-Kigali VC na RRA VC ndetse na KVC na St Aloys VC yaje gusubikwa bitewe n’uko ikipe ya RRA VC idahari aho yaserukiye igihugu mu mikino y’Afurika y’amakipe yabaye aya mbere iwayo. Muri iki kiciro APR VC iracyayoboye urutonde n’amanota 17, Ruhango VC ya kabiri n’amanota 9, RRA VC na 6 naho St Joseph nta nota ifite.

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.