20°C , Partly cloudy | Kigali-Rwanda

Volleyball: UTB irakira REG mu mukino wa kabiri wa “Playoffs 2018”

Yanditswe na NKOMEJE GUILLAUME

Ku ya 12-05-2018 saa 09:06:12
Ikipe ya UTB VC ifite akazi gakomeye ubwo iza kuba yakira REG VC mukino wa kabiri wa Playoffs

Uyu munsi

UTB VC – REG VC (Amahoro-17h00)

APR VC – Gisagara VC (Amahoro-19h00)

Uyu munsi tariki 12 Gicurasi 2018, UTB VC irakira REG VC mu mukino wa kabiri wo kwishyura muri  “Playoffs 2018”, mu irushanwa rihuza amakipe yabaye ane ya mbere muri shampiyona ya 2018, ubere kuri Sitade Amahoro saa kumini n’imwe (17h00).

Ikipe ya UTB VC ifite akazi gakomeye ubwo iza kuba yakira REG VC mukino wa kabiri wa Playoffs

Muri uyu mukino, UTB VC ni yo ifite akazi gakomeye cyane kuko ikeneye kwigaranzura REG VC yari yabatsinze amaseti 3-1, mu mukino ubanza wabereye kuri Sitade Amahoro i Remera, tariki 5 Gicurasi 2018.

Ku rundi ruhande, REG VC yo irasabwa gutsinda uyu mukino kugira ngo yizere kugera ku mukino wa nyuma.

Mbanza Sylvestre, umutoza mukuru wa UTB VC yabwiye Imvaho Nshya ko biteguye neza kandi bafite n’ikizere cyo kuza kwitwara neza.  Avuga ko udukosa twagaragaye mu mukino ubanza cyane cyane mu bijyanye no kugarura imipira itewe n’abo bahanganye “Reception” bagerageje kudukosora.

Mana Jean Paul utoza REG VC na we yemeza ko imyiteguro yagenze abakinnyi bose bameze neza. Avuga ko abizi neza ko UTB VC iza kubagora bitewe n’uko ikeneye insinzi cyane gusa na bo bizeye gutsinda uyu mikino.

Mu wundi mukino, APR VC irakira Gisagara VC. Mu mukino w’umunsi wa mbere, Gisagara VC yari mu rugo yatsinze APR VC amaseti 3-0 (27-25, 25-17 na 27-25).

Mu bagore, shampiyona nayo iragana ku musozo, uyu munsi tariki 12 Gicurasi 2018 haraba imikino ibiri gusa. St Joseph irakira KVC (10h00) naho KVC ikine na Ruhango VC (12h00). Iyi mikino yombi irabera muri GS St Joseph i Kabgayi.

Kugeza ubu, RRA VC irayoboye n’amanota 33, ikurikiwe na APR VC na 32, Ruhango VC (18), St Aloys (15), KVC (13), IPRC Kigali (8) naho St Joseph ni ya nyuma n’inota 1.

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.