Volleyball: U Rwanda ruzakira imikino y’Akarere ka 5

Yanditswe na Nkomeje Guillaume

Ku ya 24-01-2019 saa 16:49:40
Nkurunziza Gustave ukuriye ishyirahamwe ry'umukino wa Volleyball mu karere ka 5

U Rwanda ruzakira imikino y’Akarere ka 5 “Zone 5 Clubs Championship 2019”, y’amakipe mu kiciro cy’abagabo igiye gukinwa ku nshuro ya mbere ikazabera i Kigali kuva tariki 19-24 Gashyantare 2019.

Nkurunziza Gustave, umuyobozi w’ishyirahamwe ry’umukino wa Volleyball mu Karere ka 5 yatangaje ko iri rushanwa ry’Akarere ka 5 rizitabirwa n’amakipe 4 akomeye yo mu bihugu bisanzwe bigize aka karere.

Uyu muyobozi wahoze ayobora ishyirahamwe ry’umukino wa Volleyball mu Rwanda “FRVB” avuga ko ku nshuro ya mbere bagiye gutegura iyi mikino, bahereye ku kiciro cy’abagabo, hanyuma ku nshuro izakurikiraho bakazongeramo n’ikiciro cy’abagore.

Yagize ati “Buri gihugu kizohereza amakipe 4 yabaye aya mbere muri shampiyona y’igihugu kugira ngo azabe ari yo ahatana muri iri rushanwa ry’Akarere ka 5, kuri iyi nshuro (1), dufite amakipe y’abagabo gusa, ariko turateganya ko irizakurikira tuzategura n’iry’abagore.”

Nkurunziza Gustave ukuriye ishyirahamwe ry’umukino wa Volleyball mu karere ka 5

Mu mpamvu zatumye hategurwa iyi mikino y’Akarere ka 5 y’amakipe “Zone 5 Clubs Championship 2019” ni ukugira ngo habeho gufasha amakipe azitabira imikino y’Afurika “Continental Club Championships 2019” kugira imyiteguro ihagije. Ikindi ni ugutegura neza abakinnyi baba bazakinira amakipe y’ibihugu mu marushanwa atandukanye akomeye y’ibihugu.

Ubusanzwe Akarere ka 5 kagizwe n’ibihugu 12 ari byo u Rwanda, Burundi, Djibouti, Misiri, Eritrea, Ethiopia, Kenya, South Sudan, Somalia, Sudan, Tanzania, ndetse na Uganda.

Muri iyi mikino y’Akarere ka 5, u Rwanda ruzahagararirwa n’amakipe 4 ari yo Gisagara VC yatwaye igikombe cya shampiyona ya 2018, REG VC yabaye iya kabiri, UTB VC ya 3 na APR VC yabaye iya 4.

Mu yandi makipe yemeje kuzitabira harimo Amical (Burundi), Equity Bank, Prison Mombasa na KDF (Kenya), Jeshi Stars, Tanzania Police, Magereza, JKT (Tanzania), Sports S, Nemo Stars, Ndejje, KAVC na UCU (Uganda).

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.