Kigali-Rwanda

Mostly cloudy
22°C
 

Volleyball: U Rwanda ruzahura na Maroc mu guhatanira umwanya wa 3

Yanditswe na NKOMEJE GUILLAUME

Ku ya Sep 18, 2018

Ejo tariki 19 Nzeri 2018, hazaba imikino isoza amarushanwa y’Afurika y’abahungu batarengeje imyaka 21 “2018 Men’s African Nations U-21 Volleyball Championship”, ikipe y’u Rwanda izahura na Maroc mu guhatanira umwanya wa 3, saa munani z’amanywa (14h00).

U Rwanda rugomba guhatanira umwanya wa 3

Ikipe y’u Rwanda y’abahungu U-21, itozwa na Paul Bitok yari yazamutse ari iya kabiri mu itsinda rya mbere “A”, inyuma ya Misiri.

Mu mikino ibiri iheruka guhuza u Rwanda na Maroc mu guhatanira uyu mwanya wa 3, buri kipe yatsinze umukino umwe. Ikipe y’u Rwanda yegukanye umwanya wa 3 mu 2013, itsinze Maroc amaseti 3-0, ikaba yarayigaranzuraga kuko yari yatsinzwe amaseti 3-0, mu irushanwa ryaherukaga mu 2010.

Iyi kipe y’igihugu y’u Rwanda yasezerewe muri ½  na Misiri ifite igikombe k’iri rushanwa riheruka itsinzwe amaseti 3-0 (25-18, 25-16 na 25-22) naho Maroc na yo yaje gusezererwa na Tunisia iyitsinze amaseti  3-0 (25-12, 28-26 na 25-20), imikino yabaye tariki 16 Nzeri 2018.

Nyuma y’uyu mukino, Tunisia imaze gutwara ibikombe byinshi by’iri rushanwa (9) izahura na Misiri ifite igiheruka mu 2016 ku mukino wa nyuma (17h00).

Mbere y’iyi mikino, uyu munsi tariki 18 Nzeri 2018, Chad irahura na Cameroun (17h00) mu guhatanira umwanya wa 7 naho Nigeria ikine na RDC (19h00) mu guhatanira umwanya wa 5.

Muri iyi mikino y’Afurika irimo kubera i Abuja muri Nigeria, Misiri na Tunisia zageze ku mukino wa nyuma zamaze gukatisha itike yo kuzakina imikino y’igikombe k’Isi “The 2019 FIVB Volleyball Men’s U-21 World Championship” izabera i Bahrain.