Kigali-Rwanda

Mostly cloudy
21°C
 

Volleyball: U Rwanda rurakina na Misiri mu mukino wa nyuma w’igikombe cy’Afurika

Yanditswe na NKOMEJE GUILLAUME

Ku ya Sep 2, 2018

Uyu munsi

Rwanda-Misiri (17h00)

Cameroun-Nigeria (15h00)

Uyu munsi tariki 02 Nzeri 2018, ikipe y’igihugu y’abakobwa batarengeje imyaka 20  irakina na Misiri ku mikino wa nyuma w’igikombe   cy’Afurika “2018 Women’s U-20 African Nations Championship” ubere muri Sitade ya Kasarani  i Nairobi muri Kenya (17h00).

Abakinnyi b’ikipe y’u Rwanda ubwo bari mu byishimo nyuma yo kugera ku mukino wa nyuma no gukatisha itike y’igikombe k’Isi

Iyi kipe y’u Rwanda n’iya Misiri zamaze no gukatisha itike y’igikombe k’Isi “The FIVB Volleyball Women’s U-20 World Championship” kizabera muri Mexico mu 2019 zageze ku mukino wa nyuma zisezereye abo bari bahanganye muri ½ k’irangiza.

Muri iyi mikino ya ½ yabaye ku wa Gatanu tariki 31 Kanama 2018, ikipe y’igihugu y’u Rwanda  yabigezeho isezereye Cameroun yabaye iya mbere mu itsinda rya mbere “A” iyitsinze amaseti 3-1, (28-26, 23-25,25-21 na 25-20).

Ku rundi ruhande, ikipe ya Misiri baza guhura yari ifite igikombe giheruka na yo yageze ku mukino wa nyuma isezereye Nigeria iyitsinze amaseti 3-0 (25-7, 25-11 na 25-8).

Ikipe y’u Rwanda y’abakobwa U-20, itozwa na Mudahinyuka Christophe ifite akazi gakomeye ko kuba yakihorera kuri Misiri, kuko yabatsinze amaseti 3-1, (25-16, 16-25, 25-16 na 25-22) mu mukino wa gatatu w’itsinda “B” wabaye tariki 28 Kanama 2018.

Iyi kipe y’u Rwanda yageze muri ½, nyuma y’uko isoreje ku mwanya wa kabiri mu itsinda rya kabiri “B” n’amanota 7, inyuma ya Misiri yabaye iya mbere n’amanota 12, ikurikirwa na Mauritius na RDC (5) naho Uganda iba iya nyuma (5) n’inota 1.

Uyu mukino wa nyuma w’iri rushanwa uraza kuba wabanjirijwe n’uwo guhatanira umwanya wa 3, uhuza Cameroun na Nigeria saa kenda z’umugoroba (15h00). Aya makipe n’ubundi yari mu itsinda rya mbere “A”, Cameroun yari yatsinze Nigeria amaseti 3-1.