Kigali-Rwanda

Mostly cloudy
18°C
 

Volleyball: Sibomana yemeje ko ari mu biganiro byo kongera amasezerano muri Gisagara

Yanditswe na NKOMEJE GUILLAUME

Ku ya Sep 1, 2018

Sibomana Placide bakunze kwita “Madison” usanzwe akinira ikipe y’Akarere ka Gisagara y’umukino wa Volleyball “Gisagara VC” n’ikipe y’igihugu nkuru ya Volleyball aratangaza ko ari mu biganiro n’iyi kipe byo kuba yakongera amasezerano.

Sibomana Placide uri mu biganiro na Gisagara VC byo kongera amasezerano, yatwaranye nayo ibikombe 4 muri uyu mwaka wa 2018

Aganira n’Imvaho Nshya, Sibomana Placide yemeje ko bakiri mu biganiro byo kuba yakomeza kuyikinira mu gihe kiri mbere. Yanagaragaje ko kongera amasezerano muri Gisagara VC byatewe n’uko yayigizemo ibihe byiza.

Yagize ati Nk’ikipe tutabanye nabi, urabyumva turi mu biganiro ndetse turacyari kugira ibyo twumvikanaho”.

Uyu mukinnyi wagize uruhare runini mu gutuma Gisagara VC, itsindira ibikombe bine muri uyu mwaka avuga ko haba hakiri kare kugira ngo ashyire ahagaragara ibijyanye n’amasezerano yasinya muri iyi kipe.

Ntivuguruzwa Kagina Augustin, umuyobozi mukuru w’ikipe ya Gisagara VC, mu kiganiro yagiranye n’Imvaho Nshya, ku wa Kabiri tariki 28 Kanama 2018, yatangaje ko batangiye gahunda yo kongeramo amaraso mashya mu ikipe yabo.

Yanavuze ko bari mu biganiro n’abakinnyi bari basanzwe muri Gisagara VC, ngo barebe ko bakongera amasezerano y’umwaka umwe nyuma y’uko ayo bari bafite yarangiye. Abo bakinnyi barimo Sibomana Placide Madison ndetse na Mukunzi Christophe usanzwe ari kapiteni w’ikipe y’igihugu nkuru ya Volleyball.

Sibomana Placide wari wasinye umwaka umwe ubwo yerekezaga muri Gisagara VC mu 2018 avuye muri Al Awdeh Youth Club muri shampiyona ya Jordania, yatwaranye nayo ibikombe 4 birimo shampiyona, ik’irushanwa ry’Intwari “National Heroes Tournament 2018”, icyo kwibuka “GMT 2018”, ndetse n’igikombe k’irushanwa risoza umwaka w’imikino wa 2018 “Carre d’AS 2018”.