Kigali-Rwanda

Mostly cloudy
22°C
 

Volleyball: REG VC yegukanye igikombe cya shampiyona ya 2019

Yanditswe na NKOMEJE GUILLAUME

Ku ya May 20, 2019

Ikipe ya REG VC ni yo yegukanye igikombe cya shampiyona y’igihugu ya Volleyball mu kiciro cy’abagabo mu mwaka w’imikino wa 2018-2019 ibikesha kwitwara neza ku mukino wa nyuma w’irushanwa rya “Playoffs 2019” itsinda Gisagara VC imikino 2-1.

REG VC itwaye iki gikombe ku nshuro ya mbere mu myaka itatu imaze ikina iyi shampiyona yabigezeho nyuma y’uko itsinze Gisagara VC ku mukino wa nyuma wa 3 muri “Playoffs” amaseti 3-0 (25-23, 25-21 na 25-18).

Aya makipe yombi yagiye gukina uyu mukino wa nyuma wa 3 wa “Playoffs” nyuma y’uko yari yananiwe kwisobanura mu mikino ibiri yabahuje aho buri kipe yari yabashije gutsinda umukino umwe.

REG VC yabaye iya kabiri mu mwaka ushize wa shampiyona ya 2018 yatsinze Gisagara VC amaseti 3-0 (25-23, 25-23 na 30-28) mu mukino ubanza wabereye kuri Sitade Amahoro i Remera tariki 04 Gicurasi 2019 naho  umukino wa kabiri wabereye i Gisagara tariki 11 Gicurasi 2019, Gisagara VC  itsinda REG VC amaseti 3-0 (25-22,25-20 na 25-17).

Nyuma yo kwegukana igikombe, Mugisha Bavuga Benon, umutoza wa REG VC wishimiye uko abakinnyi be bitwaye muri rusange, yatangaje ko Gisagara VC bayirushije kuba bari bafite ishyaka ryo gutwara igikombe.

Yagize ati: Ibyishimo ni byinshi. Abakinnyi bange ni bo bakinnye cyane, nta bwo ari ngewe utumye REG VC ibona igikombe ni abakinnyi, gewe icyo nakoze ni ukubabereka ibyo bakora, ariko ni bo bashyizemo ingufu nyinshi cyane.”

Yungamo ati: “Abakinnyi bari biteguye gutsinda bityo n’imikinire yabo yahindutse bashakaga gutsinda, iyo umukinnyi ashaka gutsinda icyo umubwiye cyose aragikora.”

Mutabazi Elie, umutoza wa Gisagara VC yemeye ko yarushijwe ahantu hose. Ati: Twarushijwe mu by’ukuri, ikipe ya REG yaje ubona ko ifite inyota, umukino wo ku Gisagara twarakinnye tuyitsinda byoroshye tugira ngo ni naha bizatworohera, turategura ni byo ariko yo yateguraga byo hejuru birenze ku buryo n’ubwo twabanje kwitwara neza bagarutse baradutsinda, amakosa yose yabatsinze barayakosoye.”

Yakomeje agira ati: “Uyu munsi wari umukino wa nyuma, REG VC amakosa yabaye make ku ruhande rwabo, abakinnyi wabonaga ko bakina bafite ubushake, ikindi baduhinduriye umupaseri bazana Sylvetre, aza afite umukino utandukanye n’uwa Cyusa noneho kubyakira biratugora.”

Uretse REG VC yashikirijwe igikombe k’iyi shampiyona, hatanzwe n’ibihembo ku bakinnyi bahize abandi.

Ntagengwa Olivier (REG VC) yahawe igihembo cy’umukinnyi mwiza usatira akinira inyuma (Outside attacker), Niyogisubizo Samuel (UTB VC) aba umukinnyi usatira aturutse ku ruhande (Opposite attacker), Karemera Emile Dada (Gisagara VC) aba uwugariye neza (Libero), Djibril (Gisagara VC) aba uwugariye neza ukina hagati, Mahoro Yvan (UTB VC) aba uwatanze imipira neza naho Mukunzi Christophe (REG VC) ahabwa igihembo cy’umukinnyi mwiza w’umwaka.

Uko amakipe yakurikiranye muri rusange muri shampiyona y’uyu mwaka wa 2018-2019, REG VC yabaye iya mbere, ikurikirwa na Gisagara VC ifite ibikombe bibiri bya shampiyona iheruka (2017 na 2018), UTB VC ku mwanya wa 3, IPRC-Ngoma VC ku mwanya wa 4, APR VC, ku mwanya wa 5, Kirehe VC ku mwanya wa 6 naho IPRC-Karongi VC iba iya nyuma (7).

Ikipe ya REG VC ubwo yashyikirizwaga ikombe cya shampiyona