Kigali-Rwanda

Partly sunny
28°C
 

Volleyball: REG VC na APR VC ni zo zegukanye Memorial Rutsindura 2018

Yanditswe na BIZIMANA ERIC

Ku ya 26-06-2018 saa 06:35:48
REG VC ni yo yegukanye igikombe k'irushanwa rya Memorial Rutsindura 2018

Ikipe ya REG VC mu bagabo na APR VC mu bagore ni zo zegukanye irushanwa ryo kwibuka nyakwigendera Rutsindura Alphonse wahoze ari umutoza wa Volleyball ryabaye tariki 23-24 Kamena 2018 ribera mu Karere ka Huye.

REG VC ni yo yegukanye igikombe k’irushanwa rya Memorial Rutsindura 2018

REG VC yabigezeho itsinze APR VC amaseti 3-2 ku mukino wa nyuma. Yari yanakoze akazi gakomeye itsinda muri ½ Gisagara VC yayitwaye igikombe cya shampiyona ku maseti 3-2.

Nyirimana Fidele Umutoza mukuru wa Gisagara VC wahabwaga amahirwe, agaragaza ko abakinnyi be bagaragaje umunaniro nyuma ya shampiyona ari na yo mpamvu batitwaye neza muri iri rushanwa.

Ku rundi ruhande, APR VC mu bagore yigaranzuye ikipe ya RRA VC ikunze kuyigora iyitsinda amaseti 3-1.

APR VC mu kiciro cy’abagore ubwo yashyikirizwaga igikombe

Mu kiciro rusange mu bagabo, Petit Seminaire Karubanda yatsinze GSO Butare amaseti 2-0. Mu kiciro cy’amashuri abanza igikombe cyegukanywe na EP Tumba yatsinze Simbi ku mukino wa nyuma.

Mu bakanyujijeho, ikipe ya Droujba y’i Kigali ni yo yegukanye igikombe itsinze Kimisagara.

Muri beach Volleyball, Mana Jean Paul na Mbonyuwontuma Jean Luc begukanye ibikombe.

Padiri Ndahimana Jean Baptiste, umuyobozi w’iseminari ya Karubanda avuga ko irushanwa ry’uyu mwaka ryagenze neza bijyanye n’urwego rw’amakipe yaryitabiriye.

Ati « Amakipe yari ku rwego rwo hejuru kandi twanabonye ko ubwitabire bwari ku rwego rwo hejuru. Twishimiye ko intego zacu zagezweho zo guha ubutumwa urubyiruko rwo guharanira gusiga amateka abantu bazabibukiraho ».

Rutsindura Alphonse wibutswe yavukiye i Ndora mu Karere ka Gisagara mu 1958, yabaye umwarimu w’umuziki n’Ikilatini mu Iseminari, aba umusifuzi n’umutoza w’ikipe y’iseminari kuva 1983 kugeza mu 1994; aba umutoza mukuru w’ikipe y’igihugu y’abagore 1988-1990  anaba Visi Perezida w’ishyirahamwe ry’umukino wa Volleyball mu Rwanda (FRVB).

 

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.