Kigali-Rwanda

Mostly cloudy
19°C
 

Volleyball: REG VC irakira UTB VC mu mukino wa mbere w’imikino yo kwishyura

Yanditswe na Nkomeje Guillaume

Ku ya 15-12-2018 saa 16:44:22
Mu mukino ubanza wahuje izi kipe, REG VC yatsinze UTB VC amaseti 3-1

Kuri uyu wa Gatandatu tariki 15 Ukuboza 2018, shampiyona y’igihugu y’umukino wa Volleyball y’ikiciro cya mbere mu bagabo “Volleyball National League 2018-2019” irakomeza hakinwa imikino y’umunsi wa mbere yo kwishyura.

Umukino utegerejwe n’abakunzi benshi ba Volleyball urahuza ikipe ya REG VC na UTB VC kuri Sitade Nto Amahoro i Remera saa kumi n’imwe z’umugoroba (17h00).

Mu bikomeza uyu mukino, birimo kuba amakipe ya REG VC na UTB VC uretse gukurikirana ku rutonde ziranganya n’amanota kuko zombi zifite amanota 14 aho zatsinze imikino 5 zitsindwa umukino umwe.

REG VC itozwa na Mugisha Benon ikeneye amanota kugira ngo ikomeze kwizera kurangiza iri ku mwanya wa mbere aho irushwa na Gisagara VC inota rimwe (15).

Ku ruhande rwa UTB VC itozwa na Nyirimana Fidele iherutse no gusinyisha umukinnyi mushya, Sime Mbappé Julliard wakiniraga FAP muri Cameroun nayo irashaka kwitwara neza kugira ngo ikomeze gushaka umwanya wa mbere.

Mu mukino ubanza wahuje izi kipe, REG VC yatsinze UTB VC amaseti 3-1

Mu mukino ubanza wahuje amakipe yombi wabereye kuri Sitade Nto i Remera, tariki 10 Ukwakira 2018, REG VC yatsinze UTB VC amaseti 3-1 (27-25, 23-25, 25-19 na 25-23).

Uyu mukino uraba wabanjirijwe n’uri buhuze Gisagara VC iyoboye urutonde rwa shampiyona by’agateganyo na IPRC- Ngoma VC (15h00).

Ikipe ya Kirehe VC yarangije iri ku mwanya wa nyuma (7) nta nota ifite yakira IPRC-Karongi VC, umukino ubera i Kirehe (11h00).

Gisagara VC iri ku mwanya wa mbere n’amanota 15 ikurikiwe na UTB VC ndetse na REG VC zinganya 14, IPRC-Karongi VC n’amanota 8, IPRC-Ngoma VC na 7, APR VC na 5 naho Kirehe VC ni ya nyuma (7) nta nota ifite.

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.