Kigali-Rwanda

Partly sunny
21°C
 

Volleyball: REG VC irakira Gisagara VC ku munsi wa kabiri wa shampiyona

Yanditswe na Nkomeje Guillaume

Ku ya 17-11-2018 saa 14:18:41
Ikipe ya REG VC iza kwakira Gisagara VC mu mukino w'umunsi wa kabiri wa shampiyona

Uyu munsi tariki 17 Ugushyingo 2018, shampiyona y’igihugu ya Volleyball mu kiciro cy’abagabo irakomeza hakinwa imikino yo ku munsi wa kabiri aho umukino utegerejwe na benshi uza guhuza REG VC na Gisagara VC kuri Sitade Nto Amahoro i Remera (17h00).

Mbere y’uyu mukino, REG VC iraba yabanje gukina na APR VC, saa saba z’amanywa (13h00).

Muri uyu mukino uhuza REG VC yabaye iya kabiri muri shampiyona ishize (2017-2018) ndetse na Gisagara VC yabaye iya mbere, muri buri kipe baratangaza ko bagerageje kwitoza ku buryo buhagije, bityo bakaba bizeye kuza kwitwara neza.

Ikipe ya REG VC iza kwakira Gisagara VC mu mukino w’umunsi wa kabiri wa shampiyona

Mugisha Bavuga Benon, umutoza mukuru wa REG VC, atangaza ko bamaze iminsi bitoza bategura abakinnyi haba mu mutwe ndetse n’umubiri, ku buryo abona ko bizabafasha kwihanganira igitutu baza kuba bashyirwaho na Gisagara VC.

Yagize ati “Turimo kugerageza gutegura abakinnyi kugira ngo bamenyere igitutu kiza kuba gihari, kubera ko ni umukino ukomeye cyane. Twatangiye imyitozo kuva ku wa mbere kandi ndumva kuri twebwe bihagije”.

Ku rundi ruhande, Akumuntu Kavalo Patrick, umwe mu bakinnyi bakomeye ba Gisagara VC uza kuba ahanganye na mukuru we Ndamukunda Flavien bahoze bakinana, kuri ubu akaba ari kapiteni wa mushya wa REG VC na we atangaza ko biteguye neza.

Ati “Ni umukino twiteguye neza, navuga ko ari wo mukino ukomeye muri shampiyona, kuko ni yo kipe dutinya cyane ubona ikomeye kurusha izindi. Twariteguye neza, ingufu ni zose, abakinnyi bariteguye, ndumva igisigaye ari gutegereza umukino ubundi tugahangana”.

Ku munsi wa mbere wa shampiyona wabaye tariki 10 Ugushyingo 2018 aya makipe yombi yitwaye neza. REG VC yatsinze UTB VC amaseti 3 kuri 1, naho Gisagara VC yatsinze IPRC Ngoma amaseti 3 kuri 1.

Mu mukino uheruka guhuza aya makipe yombi mu irushanwa ribanziriza shampiyona “Gisagara Pre-Season Tournament 2018”, Gisagara VC yaje gutwara igikombe itsinze REG VC ku mukino wa nyuma amaseti 3 kuri 2.

Mu yindi mikino, IPRC Ngoma irakira IPRC Karongi VC (10h00), UTB VC ikine na IPRC Karongi VC (12h00) naho IPRC Ngoma VC ihure na UTB VC (14h00). Iyi mikino yose izabera i Ngoma.

Muri gahunda y’ishyirahamwe ry’umukino wa Volleyball mu Rwanda “FRVB” yo gushimisha abakunzi ba Volleyball abaza kuba bari kuri Sitade barasusurutswa n’abahanzi barimo Eric Senderi, Rukotana Victor ndetse na Uncle Austin.

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.