Volleyball: REG irakira UTB ku munsi wa mbere w’imikino y’irushanwa ry’Intwari

Yanditswe na Nkomeje Guillaume

Ku ya 25-01-2019 saa 07:32:44
REG VC na UTB VC, umwe mu mikino ikomeye y'umunsi wa mbere w'irushanwa ry'Intwari

Tariki 25-01-2019
IPRC Ngoma – IPRC Karongi (Amahoro-15h00)
Gisagara VC – APR VC (Amahoro-17h00)
REG VC – UTB VC (Amahoro-19h00)

Tariki 26-01-2019
REG VC – Kirehe VC (Amahoro-13h00)
Gisagara VC – IPRC Karongi VC (NPC-13h00)
IPRC Ngoma VC-APR VC (Amahoro-15h00)
UTB VC- Kirehe VC (NPC-15h00)
Gisagara VC – IPRCNgoma VC (Amahoro-17h00)

APR VC- IPRC Karongi VC (Amahoro-19h00)

Kuri uyu Gatanu tariki 25 Mutarama 2019 haratangira imikino y’irushanwa ryo kwizihiza umunsi mukuru w’Intwari z’igihugu muri Volleyball “Intwari Volleyball Tournament 2019” mu kiciro cy’abagabo.

Iri rushanwa ngarukamwaka ryitabiriwe n’amakipe 7 y’abagabo akaba agabanyije mu matsinda abiri. Mu itsinda A harimo Gisagara VC, APR VC, IPRC Ngoma VC na IPRC Karongi VC naho iItsinda B ririmo REG VC, UTB VC ndetse na Kirehe VC.

Mu mikino iteganyijwe ku munsi wa mbere, REG VC irakira UTB VC mu mukino utegerejwe n’abantu benshi, ukaza kubera kuri Sitade Nto Amahoro i Remera saa moya z’umugoroba (19h00).

Uyu mukino wo mu itsinda B, uraba wabanjirijwe n’indi ibiri yo mu itsinda A, aho IPRC Ngoma VC yakira IPRC Karongi VC (15h00) ndetse Gisagara VC ikine na APR VC (17h00). Kwinjira kuri iyi mikino, ni ukwishyura amafaranga y’u Rwanda ibihumbi 2 mu cyubahiro ndetse n’igihumbi muri Sitade hejuru.

Ejo tariki 26 Mutarama 2019, REG VC izakina na Kirehe VC ku Mahoro (13h00), Gisagara VC izakine na IPRC Karongi VC muri NPC (13h00), IPRC Ngoma VC izakine na APR VC ku Mahoro (15h00), UTB VC izakine na Kirehe VC muri NPC (15h00) ndetse kuri Sitade Amahoro, Gisagara VC izakine na IPRC Ngoma VC (17h00) naho APR VC izahure na IPRC Karongi VC (19h00).

Biteganyijwe ko amakipe azaba yitwaye neza azakina imikino ya ½ kirangiza izaba tariki 27 Mutarama 2019 (11h00), aho ikipe yabaye iya mbere mu itsinda A izahura n’iyabaye iya kabiri mu itsinda B naho iyabaye iya mbere mu itsinda B izahura n’iyabaye iya kabiri mu itsinda A.

Ikipe zizitwara neza zizahurira ku mukino wa nyuma uzabera kuri Sitade Nto Amahoro i Remera (17h00). Gisagara VC ni yo yegukanye igikombe giheruka itsinze REG VC ku mukino wa nyuma amaseti 3-0.

Mbere y’uko hakinwa iyi mikino, UTB VC yitwaye neza itsinda APR VC mu mukino w’ikirarane amaseti 3-0 (25-18-25-15 na 25-23) bituma ikomeza kuyobora urutonde n’amanota 28.

REG VC na UTB VC, umwe mu mikino ikomeye y’umunsi wa mbere w’irushanwa ry’Intwari

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.