Kigali-Rwanda

Mostly cloudy with showers
20°C
 

Volleyball: Irushanwa ryo kwibuka  Rutsindura  rizaba muri Kamena 2019

Yanditswe na NKOMEJE GUILLAUME

Ku ya May 8, 2019

Kuva tariki 22-23 Kamena 2019 hateganyijwe kuzaba irushanwa ryo kwibuka Rutsindura Alphonse wahoze ari umutoza wa Volleyball wazize Jenoside yakorewe Abatutsi mu 1994 “Memorial Rutsindura 2019” rizabera mu Karere ka Huye, Intara y’Amagepfo.

Aganira n’Imvaho Nshya, Padiri Uwineza Placide, umuhuzabikorwa w’irushanwa, nguruka mwaka ryo kwibuka Rutsindura Alphonse yatangaje ko bamaze gutanga ubutumire ku makipe azitabira.

Avuga ko ku nshuro ya 17 bategura iri rushanwa bagerageje gutumira amakipe yo mu Rwanda ndetse n’ayo hanze. Ati : Amakipe twarayatumiye nk’uko bisanzwe, ari ayo mu Rwanda n’ayo hanze gusa nyine ntabwo turamenya ayabyemeje ariko twarayatumiye menshi.” Amakipe batumiye  yo hanze  ni ayo muri Uganda, u Burundi no muri  Ethiopia.

Yakomeje avuga ko  batumiye amakipe yo mu Rwanda yose akina mu kiciro cya mbere (Serie A)   n’ayo mu kiciro cya kabiri (Serie B) mu  bahungu, ayo mu kiciro cya mbere (Serie A) mu bakobwa, hakaza n’amakipe yo mu mashuri y’ikiciro  rusange mu bahungu ay’amashuri abanza n’amakipe ya Beach Volleyball abahungu n’abakobwa bakuze hakaba n’ikindi kiciro cy’abahungu n’abakobwa batari muri shampiyona.

Padiri Uwineza Placide avuga ko bagiye kongera kubikurikirana kugira ngo  bamenye  amakipe  ateganya kwitabira ku buryo bitarenze tariki 22 Gicurasi 2019  baba babimenye.

Yizera ko iri rushanwa ry’uyu mwaka rizaba ryiza. Ati : “Twumva ko amakipe azaza ari menshi kurushaho kuko twatumiye kare,  kandi  turizera ko irushanwa rizaba ari ryiza kurenza ayabaye mu myaka yashize.”

Mu iri rushanwa ritegurwa n’Iseminari nto ya Karubanda “PS Virgo Fidelis”, riheruka ryabereye mu Karere ka Huye, tariki 23-24 Kamena 2018, REG VC ni yo yisubije igikombe mu kiciro cy’abagabo yongeye gutsinda APR VC ku mukino wa nyuma amaseti 3 kuri 2. Ni mu gihe mu 2017, REG VC yari yatwaye iki gikombe mu bagabo itsinze APR VC ku mukino wa nyuma amaseti 3-1.

Mu kiciro cy’abagore, APR VC  yatwaye igikombe yigaranzuye RRA VC yari yagitwaye mu 2017 iyitsinze ku mukino wa nyuma amaseti 3 kuri 1.

Mu bindi byiciro, Petit Seminaire Karubanda yegukanye igikombe mu kiciro rusange  itsinze GSO Butare ku mukino wa nyuma. Mu kiciro cy’Amashuri Abanza, igikombe gitwarwa na EP Tumba itsinze Simbi ku mukino wa nyuma.

Mu bakanyujijeho, ikipe ya Droujba y’i Kigali ni yo yegukanye iki gikombe itsinze Kimisagara ni mu gihe muri Volleyball ikinirwa ku mucanga “Beach Volleyball”, ikipe igizwe na Mana Jean Paul na Mbonyuwontuma Jean Luc yegukanye igikombe.

Rutsindura Alphonse wibukwa yavukiye i Ndora mu Karere ka Gisagara mu 1958, yabaye umwarimu mu Iseminari, aba umusifuzi n’umutoza w’ikipe y’iseminari kuva 1983 kugeza mu 1994 aba umutoza mukuru w’ikipe y’igihugu y’abagore (1988-1990)  anaba Visi Perezida w’ishyirahamwe ry’umukino wa Volleyball mu Rwanda (FRVB).

REG VC niyo yisubije igikombe k’irushanwa rya Mémorial Rutsindura 2018 itsinze APR VC ku mukino wa nyuma