Kigali-Rwanda

Partly cloudy
22°C
 

Volleyball: Inkoramutima yabonye ikipe mu kiciro cya kabiri muri Ukraine

Yanditswe na BUGINGO FIDELE

Ku ya 14-12-2018 saa 21:58:57
Inkoramutima Herve Martial (10) ari kumwe na bagenzi be mu ikipe ya GENPRO VC

Kuva mu Kwakira 2018, Inkoramutima Herve Martial wakiniraga ikipe ya REG VC  ari mu gihugu cya Ukraine aho yagiye gukomereza amasomo   muri Kaminuza yitwa  “National Aerospace University” ibarizwa mu mujyi wa Kharkiv  muri Ukraine.

Inkoramutima aganira n’Imvaho Nshya yatangaje ko   yamaze kubona ikipe  mu kiciro cya kabiri azakinira umwaka umwe.   Tariki 13 Ukuboza 2018 ni bwo Inkoramutima yasoje igeragezwa mu ikipe ya  GENPRO VC  ayisinyira kuzayikinira umwaka umwe (2018-2019).

Inkoramutima Herve Martial (10) ari kumwe na bagenzi be mu ikipe ya GENPRO VC

Nyuma y’uyu mwaka umwe, Inkoramutima avuga ko yamaze kumvikana n’ikipe yo mu kiciro cya mbere, Penguins VC  kuzayerekezamo mu mwaka w’imikino wa 2019-2020.

Mbere yo kubona iyi kipe, Inkoramutima yari yabanje mu ikipe yitwa Lubred VC ariko abona itari ku rwego rwiza. Ati “Iyi kipe nta kintu yari kumarira kuko yari iri ku rwego rwo hasi”.

Ubwo Inkoramutima (10) yari mu ikipe ya Lubred VC yabanje gukoreramo imyitozo

Inkoramutima avuga ko kujya kwiga muri Ukraine yabifashijwemo n’umuryango we ahageze atangira gushaka aho yakomereza gukina Volleyball. Ati “ Nagiye njya mu makipe atandukanye ngo nerekane impano yanjye none byarakunze”. Akomeza avuga ko kwiga no gukina bitazamugora kuko mu mashuri yisumbuye yabishoboraga.

Inkoramutima  ubu ufite imyaka 19 y’amavuko yazamukiye muri Petit Seminaire Virgo Fidelis (PSVF) i Huye aho yize imyaka 6 y’amashuri yisumbuye kuva muri 2011 kugeza  muri 2017.

Mu mwaka w’imikino wa 2017-2018, Inkoramutima yakiniye REG VC isoza ku mwanya wa kabiri muri shampiyona y’u Rwanda.

Muri 2016, Inkoramutima  ari kumwe n’ikipe y’u Rwanda yari abereye kapiteni  yitabiriye imikino y’Afurika mu batarengeje imyaka 19 “U-19 African Nations Championships 2016” yabereye muri Tunizia yegukana igihembo cy’umukinnyi watanze neza imipira kurusha abandi “Best Server”.

Muri 2016 ubwo Inkoramutima Herve Martial yitabiraga irushanwa mpuzamahanga bwa mbere muri Tunizia

Mbere yo kwerekeza muri Ukraine,  Inkoramutima ari kumwe n’ikipe y’u Rwanda yitabiriye imikino y’Afurika mu batarengeje imyaka 21 “Men’s U-21 African Nations Championship”  yabereye  Abuja muri Nigeria  tariki 10 kugeza 20 Nzeri 2018.

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.